2016 jylǵy 18 naýryz, Astana, Úkimet Úıi
Biryńǵaı jınaqtaýshy zeınetaqy qorynyń zeınetaqy aktıvteri esebinen satyp alýǵa ruqsat etilgen qarjy quraldarynyń tizbesin bekitý týraly
«Qazaqstan Respýblıkasynda zeınetaqymen qamsyzdandyrý týraly» 2013 jylǵy 21 maýsymdaǵy Qazaqstan Respýblıkasynyń Zańy 6-babynyń 1-1) tarmaqshasyna sáıkes Qazaqstan Respýblıkasynyń Úkimeti qaýly etedi:
1. Qosa berilip otyrǵan biryńǵaı jınaqtaýshy zeınetaqy qorynyń zeınetaqy aktıvteri esebinen satyp alýǵa ruqsat etilgen qarjy quraldarynyń tizbesi bekitilsin.
2. Osy qaýly alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi.
Qazaqstan Respýblıkasynyń Premer-Mınıstri K.MÁSIMOV.
Qazaqstan Respýblıkasy Úkimetiniń
2016 jylǵy 18 naýryzdaǵy №149 qaýlysymen bekitilgen
Biryńǵaı jınaqtaýshy zeınetaqy qorynyń zeınetaqy aktıvteri esebinen satyp alýǵa ruqsat etilgen qarjy quraldarynyń tizbesi
1. Sheteldik qarjy quraldary, onyń ishinde sheteldik qarjy naryqtaryndaǵy aınalystaǵy quraldar:
1) memlekettik jáne agenttik baǵaly qaǵazdar;
2) halyqaralyq qarjy uıymdarynyń (HQÚ) baǵaly qaǵazdary;
3) korporatıvtik boryshtyq baǵaly qaǵazdar;
4) jyljymaıtyn múlik (MV8) jáne aktıvter (AV8) kepilimen baǵaly qaǵazdar;
5) aksııalar, aksııalarǵa depozıtarlyq qolhattar;
6) «keri REPO» operasııalary;
7) shetel valıýtasymen jáne altynmen depozıtter (salymdar);
8) standartty týyndy qarjy quraldary;
9) qurylymdyq ónimder;
10) valıýtalar;
11) aqsha naryǵynyń qorlary;
12) quıma jáne metall shottardaǵy altyn;
13) ıslamdyq qarjylandyrý quraldary.
2. Qazaqstandyq qarjy quraldary:
1) Qazaqstan Respýblıkasynyń memlekettik baǵaly qaǵazdary;
2) Qazaqstan Respýblıkasy memlekettik baǵaly qaǵazdarynyń kepilimen «keri REPO» operasııalary;
3) kvazımemlekettik sektor sýbektileriniń Qazaqstan Respýblıkasy Bıýdjet kodeksiniń 3-baby 1-tarmaǵynyń 31) tarmaqshasynda aıqyndalǵan boryshtyq baǵaly qaǵazdary;
4) Qazaqstan Respýblıkasy ekinshi deńgeıdegi bankteriniń rettelgen oblıgasııalaryn qospaǵanda, boryshtyq baǵaly qaǵazdary;
5) teńgemen, shetel valıýtasymen jáne altynmen depozıtter (salymdar);
6) Qazaqstan Respýblıkasy Úkimetiniń kepildigimen jáne/nemese kepilgerligimen shyǵarylǵan memlekettik emes boryshtyq baǵaly qaǵazdar;
7) standartty týyndy qarjy quraldary;
8) quıma jáne metall shottardaǵy altyn;
9) ıslamdyq qarjylandyrý quraldary;
10) kvazımemlekettik sektordyń jáne ekinshi deńgeıdegi bankterdiń baǵaly qaǵazdaryn qospaǵanda, memlekettik emes boryshtyq baǵaly qaǵazdar;
11) aksııalar, aksııalarǵa depozıtarlyq qolhattar.