ASTANA. 31 naýryz. Grýzın pıanıstkasy Tamar Babılýa fortepıanoda toqtamastan 25 saǵat oınap, óz eliniń jańa rekordtyq nátıjesine qol jetkizdi. Bul týraly ras.kz-ke silteme jasaǵan egemen.kz tilshisi habarlady.
Eksperıment Grýzııa ulttyq parlament kitaphanasynyń akt zalynda 28 naýryz kúni saǵat 12:00-de bastalyp, 29 naýryz kúni saǵat 13:00-de aıaqtalǵan. Osy ýaqyttyń ishinde mýzykant qyz óziniń shyǵarmalary men belgili kompozıtorlardyń týyndylarynan 500-ge deıin kompozısııa oınaǵan. Bul grýzın pıanıstkasynyń osy turpatta rekord jasaýdaǵy birinshi talpynysy emes. Tamar Babılýa mundaı eksperımentke 2015 jyly júgingen eken. Alaıda, kóp uzamaı qyzdyń qaterli isik aýrýynyń úshinshi kezeńimen aýyratyny anyqtalǵan. Osy naýqasyna baılanysty Tamar eksperımentti toqtata turǵan. Sebebi, ol munyń kóp kúshin alyp ketetin bolǵan.
«Men 2015 jyly Gınnestiń rekordyn jańartqan Bens Pıterdiń oıynyn YouTube-tan kórdim. Osydan keıin men de ózimniń aldyma sondaı maqsat qoıdym. Men sol kezde-aq toqtaýsyz 25 saǵat oınap, rekordty jańartqym kelgen. Ol kezde eń joǵary kórsetkish 22 saǵat 10 mınýt bolatyn. Alaıda, densaýlyq jaǵdaıyma baılanysty budan bas tartýǵa týra keldi. Osydan keıin úndistandyq bir er kisi 127 saǵat 8 mınýt kidirissiz oınap, rekordty múldem ózgertip jiberdi. Men osy rekordtyń ózinen asyp túspekshi edim. Biraq dárigerlerim munyń táýekeli tym joǵary ekenin aıtyp, densaýlyǵyma qaraýymdy surady. Sondyqtan men ózimizdiń ulttyq rekordpen shektelgendi jón kórdim», – dedi Bıbılýa.
Grýzııa rekordtar federasııasynyń prezıdenti Davıd Begıashvılı Bıbılýanyń rekordyn naǵyz erik-jigerdiń kórinisi retinde baǵalady.
Tamar Babılýa fortepıanoda úsh jasynan beri oınap keledi. Ol - kóptegen ulttyq jáne halyqaralyq konkýrstardyń laýreaty. Grýzııadaǵy mýzyka oryndaýshylarymen jáne dybys jazba stýdııalarymen jumys jasasady. Tamar 2014 jyldan beri Niutone vokalıster tobynyń pıanıstkasy bolyp keledi.
Talǵat Raıymbek.
Derek: ras.kz.
Foto: dolcevita-magazine.com.