Brazılııanyń Rıo-de-Janeıro shtatynda oryn alǵan sý tasqyny men laı kóshkini saldarynan qaza tapqandar sany 500-den asty.
Laı balshyq pen tas kóshkini kóptegen turǵyn kvartaldardy basyp qalǵan. Kedeıler turǵan poselkeler ǵana emes, týrısterge arnalǵan kóriktendirilgen aýdandar da búlinshilikke ushyraýda. Eldiń azamattyq qorǵanys qyzmetiniń málimetteri boıynsha, 13,5 myń adam úı-kúısiz qalǵan. Kólik qatynasyndaǵy irkilis saldarynan qutqarý jumystarynda qıynshylyqtar týyndaýda. Zardap shekkenderge kómek retinde ókimet 360 mıllıon eýro bólip otyr. Apat aımaǵynda tótenshe jaǵdaı jarııalandy.
Eýroodaq Álıev reformalaryn qoldaıdy
Ázirbaıjan prezıdenti Ilham Álıev pen Eýrokomıssııa tóraǵasy Hose Manýel Barrozýdyń mańyzdy strategııalyq máselelerdi talqylaýǵa arnalǵan kezdesýi shyn yqylasty dostyq jaǵdaıynda ótti, dep habarlady osy eldiń APA agenttigi.
Qyzmettestiktiń barlyq qyrlary qamtylǵan kelissózde Barrozý Eýroodaqtyń prezıdent I.Álıev júrgizip otyrǵan reformalardy qoldaıtynyn málimdegen. Ol Ázirbaıjannyń «Shyǵystyq áriptestik» baǵdarlamasyn eldi damytýdyń mańyzdy faktory dep sanaıtynyna rızashylyq bildire otyryp, osy elmen qyzmettestikti óristetýge negizdelgen jańa Assosıatıvtik kelisimniń bar ekenin jáne soǵan sáıkes kelissózderdiń bastalyp ketkenin habarlaǵan. Onda Ázirbaıjannyń Eýropa rynoktaryna shyǵýy men vızalyq rejimdi jeńildetý máseleleri qarastyrylǵan.