Reseıdiń tórinde meımanhana bolyp esik ashty
Reseıdiń ortalyq aımaqtarynyń biri bolyp sanalatyn Nıjnıı Novgorod oblysynda qazaqtyń kıiz úılerinen quralatyn meımanhana kesheni kelýshilerge esigin aıqara ashty. Ony munda Qazaqstannan kóship kelgen Alekseı jáne Pavel nyspyly eki ofıser jasapty.
Qalyń jurtshylyq ejelgi Novgorod jerinde osyndaı bir qutty qonystyń qatarǵa qosylyp jatqanyn reseılik bloger Anna Vıngýrttiń áleýmettik jelilerde taratqan aqparynan keıin bildi. Ol óziniń jeke paraqshasyna «Bul Qazaqstan emes! Biz Nıjnıı Novgorod oblysynyń Bor aýdanyndamyz. Bul shynynda – adam sengisiz nárse», dep jazdy.
Annanyń aıtýynsha, uıadaı jyp-jyly qarasha úıler kıizden jáne qamystan jasalǵan tósenishten turady. Mundaǵy aýdany 23 sharshy metrdi alatyn kıiz úıler adamdar turý úshin tigilse, 73 sharshy metrdi alatyn kelesi bóligi 60 oryndyq banket zaly esebinde boı kótergen. «Alekseı sýǵa shomylyp alǵylary keletinder úshin qoıylǵan úlken astaý ydystyń qalaı jylytylatynyn túsindirip berdi. Onda orys monshasy da bar. Sosyn ózi daıyndaǵan palaýdy aldymyzǵa jaıyp saldy. Palaýdyń etin de ózderi ázirleıdi eken. Olardyń fermasynda 500 qoıy baǵylyp jatyr», dep atap kórsetedi Anna Vıngýrt.
Alekseı men Pavel Novgorod jerine kıiz úılerdi Qazaqstanda arnaıy jasattyryp ákelgen eken. Qazir týrıstik fırmalar osy kıiz oteline týrıster ákelip turatyn kórinedi.
Murat AITQOJA.