Qazaq tarıhynda eleýli eńbek sińirip, týǵanyna el qýanǵan, rýhyna jer qýanǵan tuǵyrly tulǵalar az emes. Sondaı asyl azamattardyń biri bolǵan, Qazaq gýmanıtarlyq zań ýnıversıtetin basqarǵan, zań ǵylymdarynyń doktory – Maqsut Nárikbaev.
Ol kisi jaıly jazylǵan maqala da, aqparat ta, eren eńbegi úshin alǵan ataq-dańqy da jeterlik. Degenmen, osy úrdisti úzbeı jaqsynyń aty jattala bersin degen nıetpen Qazaq gýmanıtarlyq zań ýnıversıtetinde Maqsut Sultanulynyń atyna berilgen kitaphananyń ashylý saltanaty boldy. Kitaphana birneshe zaldan turady. Olardyń ishinde, elektrondy qorlar zaly, shetel ádebıeti zaly, kishi oqý zaly, merzimdi basylymdar zaly, professor M.S.Nárikbaevtyń jeke kitaphanasy zaly, ámbebap oqý zaly, sırek jáne qundy kitaptar zaly, normatıvtik-quqyqtyq ádebıetter zaly, ǵylymı ádebıetter zaly bar. Ár zaldyń ózine tán ereksheligi de joq emes. Mysaly, sırek jáne qundy kitaptar zaly ensıklopedııalardan, sonymen qatar, kórkem, ǵylymı, bıblıografııalyq, polıgrafııalyq nemese ózge de qundylyǵymen erekshelenetin avtorlyq qoltańbalar qoıylǵan kitaptardan turady. Al shet el ádebıeti zalyna anyqtamalyq basylymdar, ensıklopedııalar, sózdikter, aǵylshyn tilindegi jýrnaldar qoıylǵan. Quqyqtaný, áleýmettik ǵylymdar, fılosofııa, din, ekologııa, ekonomıka, aǵylshyn tilin zertteý men oqytýdyń ádistemesi, óner, ádebıet, tarıh sııaqty san salaly ǵylymdar jaıly mańyzdy maǵlumattardy da osy zaldan kezdestirýge bolady. Professor M.Nárikbaevtyń jeke kitaphanasy zalynda ol kisiniń ár jyldary jaryq kórgen kitaptary, merzimdi basylymdar men jınaqtarda jarııalanǵan maqalalary toptastyrylǵan. Sondaı-aq, ǵalymnyń jeke kitaphanalyq qory elektrondy katalogqa, «NAR TULGA» málimetter bazasyna engen.
Qonaq abonementin paıdalana otyryp, Astana qalasynyń barlyq turǵyndary atalmysh kitaphananyń oqyrmany atana alatynyn esterińizge salamyz.
Raýan QAIDAR,
«Egemen Qazaqstan».