Áleýmettik salanyń áleýetimen tanysty

Keshe Premer-Mınıstrdiń orynbasary Darıǵa Nazarbaeva Astana qalasynyń bir­qatar áleýmettik nysandaryn aralady. Baǵ­darlama boıynsha, aldymen №10 qalalyq em­hananyń, elordalyq densaýlyq saqtaý bas­qar­masynyń Call-ortalyǵy jáne emhanalarǵa kelýshilerdi densaýlyq jaǵdaıynyń dárejesine qaraı qabyldaýdy qamtamasyz etetin TRIAGE-júıesiniń jumystarymen tanysty. Úkimet basshysynyń orynbasary emhanany aralap, dárigerlerdiń medısınalyq jańa qural-jabdyqtarymen jumys isteý barysymen tanysty. Aıta ketetin bolsaq, elordadaǵy №10 qalalyq emhana «100 mektep – 100 aýrýhana» memlekettik baǵdarlamasynyń aıasynda salynyp, 2014 jyldyń aqpan aıynda ashylǵan bolatyn. Emhana bir aýysymda 500 adam qabyldaıdy, onyń 350-i eresek turǵyndar bolsa, 150-i balalar. Medısınalyq mekemede ozyq tehnologııa negizindegi quraldarmen jabdyqtalǵan ota jasaý kabıneti bar. Sodan keıin Darıǵa Nazarbaeva №10 qalalyq emhanada Astana qala­sy­nyń medısınalyq qyzmet­ker­lerimen kez­desti. Salıqaly áńgime barysynda búginde elordanyń medısınalyq salasynda oryn alǵan problemalar men qol jetkizgen jetis­tikter jan-jaqty tilge tıek etildi. Búginde emhanadaǵy dáriger­lerdiń syrqattardy qabyldaýǵa bólingen ýaqytynyń 40 paıyzy qaǵaz toltyrýmen ótedi eken. Osy­ǵan baılanysty Úkimet basshy­synyń orynbasary qalalyq densaýlyq saqtaý departamentiniń basshysy Erik Baıjúnisovten qaǵaz­bastylyqpen kúres barysy qalaı júzege asyrylyp jatqanyn surady. «Qaǵazbastylyqpen kúres pármendi júrgizilýde. Alaıda, qazirgi kúnde qoldanystaǵy baǵdarlamalardyń ózi 14-ke jýyq. Olardyń bárine jaýap berý kerek. Biz qaǵazbastylyqty azaıtý maqsatynda osy sáýir aıynan bastap smart-medısına baǵdarlamasyn engize bas­taımyz. Bul ozyq ádis qaǵazbastylyqty barynsha azaıtýǵa tıis», dedi departament basshysy. Premer-Mınıstrdiń orynbasary qalalyq medısına salasynda biryńǵaı derek bazasyn quryp, bul máseleni tolyq avtomattandyrýdy usyndy. Sonymen birge, dárigerler qaýymymen kezdesý barysynda qala mektepterindegi balalardy tamaqtandyrýdyń sapasy men qaýipsizdigin arttyrý, emhanalardaǵy kezekti azaıtý jáne basqa ózekti máseleler tilge tıek etildi. Úkimet basshysynyń orynbasary As­tana qalasy ákimdigine qarasty kásiptik-tehnıkalyq kolledjde boldy. Mun­da jetim jáne ata-anasynyń qamqor­lyǵynan tys qalǵan balalar memle­kettik tapsyrys boıynsha bilim alady. Kolledj búgingi zamannyń ozyq oqý-óndiristik sheberhanasymen, sport jáne akt zaldarymen, medısınalyq ortalyq kitap­hana jáne jaıly jataqhanalarmen jab­dyqtalǵan. Astana ákimdiginiń kásiptik-tehnıkalyq kolledjiniń ujymymen jáne oqýshylarymen ótken kezdesý barysynda Premer-Mınıstrdiń orynbasary Qazaqstannyń eńbek naryǵynda IT salasynyń mamandaryna degen suranystyń artatyndyǵyn málimdedi. «Aldaǵy ýaqytta IT mamandaryna degen suranys eleýli túrde artady. Biz qazirgi kezde sandyq Qazaqstan baǵdarlamasymen jumys isteýdemiz. Investısııalar jáne damý mınıstrliginiń málimetinshe, aldaǵy úsh jylda elimizge 65 myń IT mamandary kerek bolady. Iаǵnı, osy merzimde jyl saıyn bizdiń kolledjder men ınstıtýttar shamamen 20 myń maman daıarlaýy kerek», dedi Darıǵa Nazarbaeva. Osy másele tóńireginde Bilim jáne ǵylym mınıstri Erlan Saǵadıev 2016 jyldyń 1 qańtarynan bastap mektepterde, kolledj­derde ınformatıka jáne aqparattyq tehnologııalar pánderi aǵylshyn tilinde júrgiziletindigin aıtyp ótti. Úkimet basshysynyń orynbasary budan keıin №81 «Astana English Shool» atty daryndy balalar gımnazııasynyń oqý úderisimen tanysty. Gımnazııa qabyrǵasynda bolǵan áńgime barysynda mektepterde aǵylshyn tilin tereńdetip oqytý máselesi tilge tıek etildi. Sonymen birge, pedagogtar ujymy ókilderimen úsh tildi jáne bes kúndik oqytý júıesin engizý máseleleri sóz boldy. «Jastar» teatrynda bolǵan kezinde Úkimet basshysynyń orynbasary teatr óneri ókilderimen mádenıet jáne óner salasyn damytý máselelerin sóz etti. Senbi kúni Premer-Mınıstrdiń orynbasary Darıǵa Nazarbaevanyń elordadaǵy áleýmettik nysandardyń jumysymen tanysý sapary jalǵasatyn bolady. «Egemen-aqparat».