Álem-jálem álem
Vetnamnyń tarıhynda eldiń joǵarǵy bıligine eń alǵashqy áıel kóterildi. Ulttyq jınalys (parlament) tóraıymy bolyp Ngýen Thı Kım Ngan saılandy.
Konstıtýsııa boıynsha eldiń eń joǵary bıligi bolyp tabylatyn parlament spıkeri laýazymy úshin talasqa túsken 62 jastaǵy Ngýen jınalys músheleriniń 95,5 paıyzdyq daýysyna ıe boldy. Budan buryn ol qarjy mınıstrliginde istegen eken.
Fın premeri úıin bosqyndarǵa satyp jiberdi
Fınlıandııa premer-mınıstri Iýha Sıpılıa buryn ýáde bergenindeı, bosqyndardy ornalastyrý úshin úıin Kempel qaýymdastyǵyna satty.
Sıpılıanyń aıtýyna qaraǵanda, ol áıeli ekeýi úshin budan góri shaǵyndaý úı satyp alǵan. Al ótken jylǵy qyrkúıekte premer is júzinde paıdalanylmaı otyrǵan Kempeldegi úıin mıgranttarǵa berýge ázir ekenin bildirgen. Biraq ol kezde úıdiń satylyp beriletini týraly bir aýyz sóz aıtylǵan joq edi.
Zeınettegi sportshylardyń eń baıy – Maıkl Djordan
2003 jyly sporttyq mansabyn aıaqtaǵan basketbolshy Maıkl Djordan ótken jylǵydaı bıyl da zeınettegi sportshylar arasynda Forbes tiziminiń kóshin bastap tur.
Qazir bıznesmen jáne «Sharlott Hornets» klýbynyń qojasy retinde tanymal bolyp otyrǵan «Chıkago Býllzdyń» burynǵy ataqty oıynshysy 110 mıllıon dollar tabys taýyp úlgerdi. Munysy – ekinshi oryndaǵy eks-fýtbolshy Devıd Bekhemniń tabysynan 45 mıllıon dollar kóp. Jyldan jyl uzaǵan saıyn Djordannyń tanymaldylyǵy tómendep otyrǵan joq. Buǵan qosa, 2016 jyly onyń qazir oınap júrgen kez kelgen oıynshydan keminde 30 mıllıon dollardy artyq tabatyny aıtylyp jatyr.
Adamnyń esimi ǵumyrynyń uzaqtyǵyna áser etedi
Amerıka ǵalymdary adamnyń esimi onyń ǵumyrynyń qanshalyqty uzaq jáne qysqa bolatynyna áser etedi degen uıǵarymǵa kelip otyr.
Oqymystylar sábıge dúnıe esigin attaǵan kezinde qoıylǵan attyń onyń ómirbaıanyna tkeleı yqpaly bolatynyn dáleldep shyǵypty. Zertteý úshin Alabama, Mıssýrı, Illınoıs jáne Soltústik Karolına shtattarynda 1802-1970 jyldary turǵan 3 mıllıonnan astam afroamerıkalyqtardyń ómir joldary qarastyrylǵan. Sonda mamandar ejelgi Táýrattan alynǵan aty bar adamdardyń basqalarǵa qaraǵanda, orta eseppen eki jyl artyq ómir súretinin baıqaǵan.
Qaladaǵy qustar da aqyldyraq bolyp shyqty
Kanadanyń Makgıll ýnıversıtetiniń ǵalymdary daladaǵy qustarǵa qaraǵanda, qalany meken etetin qanattylardyń aqyldyraq bolyp keletinine, olardyń ımmýnıtetteri de kúshtirek ekenine kóz jetkizgen.
Zertteýshiler dalada erkin ósken jáne qala tirshiligin kórip júrgen qustardyń basty aıyrmashylyǵyn alǵa qoıylǵan maqsattary men juqpaly aýrýǵa qarsylyǵy deńgeıinen kórip otyr. Tekserý kezinde qalalyq qustar testiden sáttirek ótip, jańa resýrstardy ıgerýde biraz artyqtyq tanytqan. Tájirıbege Barbados aralynyń ár qıyrynan ustalǵan 53 sýyqtorǵaı tartylǵan.
KHDR bıligi halyqty ashtyqqa daıyn bolýǵa shaqyrdy
Soltústik Koreıanyń úkimeti el azamattaryna alda kele jatqan ekonomıkalyq saladaǵy kúrdeli ýaqyt synyna daıyn bolý kerektigin eskertti.
«Revolıýsııa joly – uzaq ta qıyn. Bálkim, bizge taǵy da ósimdikterdiń tamyryn talǵajaý etýge týra keletin shyǵar», – delingen memlekettiń partııalyq gazeti «Nodon Sınmýnda» jarııalanǵan habarlamada. Osy oraıda sarapshylar eldiń 1994 jyldyń basynda osyndaı asharshylyqty bastan keshkenin aıtady. Tórt jylǵa sozylǵan sol kezeńde 22 mıllıon halyqtyń jarty mıllıonnan astamy opat bolǵan eken.
Aqparat agenttikteriniń materıaldary negizinde daıyndaldy.