Oljas Súleımenov suhbattary

toptastyrylǵan kitaptyń tusaýkeser rásimi «Ekspress K» gazetiniń redaksııasynda ótti «Ol jas – on molodoı» dep atalatyn bul ózgeshe kitaptyń avtory belgili jýrnalıst Tileýjan Esilbaev. Jınaqqa onyń 2008 jyldan bastap qazaqtyń asa kórnekti jazýshysy, qoǵam qaıratkeri, dıplomat, lıngvıst Oljas Omaruly Súleımenovpen sońǵy jeti jyl boıy júrgizgen segiz suhbaty kirgen eken. Ýaqytpen birge ty­nys­taǵan zamanaýı suhbattar avtordyń ózi qyzmet atqaratyn respýblıkalyq qoǵamdyq-saıası «Ekspress K» gaze­tinde edel-jedel jarııalanyp tur­ǵa­nyn zeıindi de beıildi qaýym biledi. Bul suhbattarda jurtshylyqty tolǵandyryp júrgen kóptegen kókeıkesti máselelerdiń keń aýqym­da qamtylǵany baıqalady. Kózge súıkimdi, qolǵa tolymdy kózaıym kitapty alǵash paraq­taǵanda taqyryptardyń ózinen-aq olardyń ulttyq ádebıet pen mádenıettiń taǵdyry, Qazaq­stannyń álemde alar orny, saıasat pen tarıh, lıngvıstıka men tildiń damýy, jalpy ádebıet pen qoǵam haqyndaǵy azamattyq hám aqyndyq óreli tolǵanystar ekendigin paıymdaımyz. Álbette, Oljas Súleımenovtiń kez kelgen máseledegi pikir-paıy­my, kózqarasy eshkimdi eshqashan beıjaı qaldyryp kórgen emes.  Myna suhbattarda álemge áıgili qalamgerdiń ózi bel ortasynda bolǵan HH-HHI ǵasyrlardyń oqıǵa­laryna bergen dál de dáıekti baǵasyn bilý oqyrmanǵa qyzyq bolmaǵy shúbásiz. О́ıtkeni, Oljekeń suńǵyla zergerlikpen sonshalyqty dál sıpattaǵandaı, Kitap pen Ádebıettiń mán-mańyzy jeke adam úshin ǵana emes, jalpy qoǵam men el úshin qashanda birinshi kezekte, biregeı orynda turmaq. Tileýjan Esilbaev osy jaılardy aıta kele, Oljas Omarulyna kitaptyń súıinshi danasyn úıine aparyp syılaǵanyn, ol kisi eńbekke yrzashylyq bildirgenin jetkizdi. Sonymen birge, suhbattardyń qazaqsha nusqasynyń qosa berilýi jınaqty neǵurlym tolyqqandy tolaıym etip, qundylyǵyn arttyra túsken. Avtor budan ári suhbattardy qazaq tiline tushymdy ári jatyq aýdaryp shyqqan jýrnalıst Eskendir Ertaıdyń ilkimdi eńbegine alǵys aıtty. Sondaı-aq, úlken ǵalym, oljastanýshy desek jarasymdy, Safar Abdýllonyń alǵysózi de mol maǵlumattar berip, máıekti oılar tógip, kitapty kór­keıtip, mazmunyn ashyp turǵanyn aıtqan lázim. «Ekspress K» gazeti redak­sııasynyń bas dırektory Ádilhan Núsipov Oljas Súleımenov ga­zettiń úlken dosy, turaqty avtory ári oqyrmany ekenin alǵa tartyp, atalmysh jobanyń osy­laı tamasha iske asqany ózderin maqtanysh sezimine bólep otyrǵanyn basa aıtty. Ári redaksııanyń Eýrazııalyq Toppen birge kitaptyń shyǵýyna demeýshilik jasaǵanyn kóptiń qaperine saldy. «Kazahstanskaıa pravda» respýb­lıkalyq gazeti» AQ basqarma tór­aǵasy Aleksandr Tarakov, jýr­nalıst Sergeı Leskovskıı jáne basqa sóıleýshiler avtordy osynaý aıtýly eńbekpen qut­tyqtap, Oljas Súleımenovpen júıeli suhbattar kitabynyń Va­shıngtonda ótip jatqan Iаdrolyq qaýipsizdik jónindegi sammıt qar­sańynda shyq­qanyn, osynaý kúnderde Qazaqstan men AQSh Prezıdentteri Nursultan Nazarbaev pen Barak Obama ıadro­lyq qaýipsizdik jáne taratpaý salasyndaǵy ynty­maqtastyq týraly birlesken málimdeme jasaýyn jaqsylyq jorasyna balady. Oljas aqyn, Oljas azamat basynda turǵan «Nevada-Semeı» qozǵalysy tutatqan úmit otynyń osylaı laý­laı túskeni ǵanıbet qoı. Alda – Semeı polıgony jabylýynyń 25 jyldyǵy. Olaı bolsa, daryndy jýrnalıst Tileýjan Esilbaevtyń zama­nymyzdyń aqıyq aqyny  Ol­jas Súleımenovpen suhbattar kita­by ortaq muratqa olja salǵany anyq. Qorǵanbek AMANJOL, «Egemen Qazaqstan». ASTANA.