Eldegi memleket esebinen jatypisher aramtamaqtarǵa, surqııa sybaılasqan jemqorlarǵa qarsy baǵyttalǵan kúres kúnnen-kúnge qanatyn keń jaıyp, kúshine enip keledi. Bul oraıda sybaılas jemqorlyqqa qarsy kúresti kúsheıtý týraly Elbasynyń bergen tapsyrmalaryna saı el ıgiligi úshin atqarylyp jatqan ister barshylyq. Osy jalpyhalyqtyq ardaqty iske dem berýde jańadan qaıta qurylyp jatqan qoǵamdyq keńesterdiń orny bólek bolyp tur. Máselen, sonyń bir aıǵaǵy retinde Memlekettik qyzmet isteri mınıstrliginiń janyndaǵy Qoǵamdyq keńes jumysyn aıtýǵa bolady. Bul sózimizge naqty dálel, keshe osy Qoǵamdyq keńestiń kezekti otyrysy ótti. Oǵan «Jańarý» sybaılas jemqorlyqqa qarsy jalpyulttyq qozǵalysy» respýblıkalyq qoǵamdyq birlestiginiń basshysy O.Ábdikárimov tóraǵalyq etti.
Atalǵan is-sharaǵa keńes músheleri, mınıstrliktiń qurylymdyq bólimsheleri, vedomstvoǵa qarasty uıymdardyń – Qazaqstan Respýblıkasy Prezıdenti janyndaǵy memlekettik basqarý akademııasynyń, «Memlekettik qyzmettiń personalyn basqarý ulttyq ortalyǵy» AQ-tyń basshylary da qatysty.
Jınalys barysynda Qoǵamdyq keńes músheleri komıssııa qyzmetiniń negizgi baǵyttaryn qalyptastyrý, aǵymdaǵy jyldyń jumys josparyna ózgertýler engizý boıynsha jańa máselelerdi qarastyryp, sondaı-aq, mınıstrliktiń qurylymdyq bólimsheler men vedomstvoǵa qarasty uıymdardyń qyzmetimen tanysty. Májilistiń qorytyndysy negizinde Qoǵamdyq keńestiń negizgi baǵyttary boıynsha tómendegideı: mınıstrliktiń strategııalyq maqsattaryn júzege asyrý men bıýdjettik baǵdarlamalardyń oryndalýy monıtorıngi boıynsha; memlekettik qyzmet pen memlekettik qyzmet kórsetý salasyn jetildirý máseleleri jóninde; sybaılas jemqorlyqqa qarsy is-qımyl máseleleri boıynsha memlekettik organdardyń qyzmetin taldaý jóninde; ádep erejesi men ádep jónindegi ýákil máseleleri boıynsha 4 komıssııa qurylyp, bekitildi.
Atalǵan komıssııa tóraǵalary bolyp memlekettik qyzmet salasyna eńbegi sińgen ardager Qarabolat Nurtazın, Prezıdent janyndaǵy memlekettik basqarý akademııasy memlekettik basqarý men memlekettik qyzmet kafedrasynyń professory Zınaıda Fedotova, Parlament Senatynyń depýtaty Georgıı Kım jáne Qazaq gýmanıtarlyq-quqyq ýnıversıtetiniń professory, Prezıdent janyndaǵy raqymshylyq jasaý komıssııasynyń múshesi Tólesh Kaýdyrov taǵaıyndaldy.
Otyrysta keńes músheleri «Ádep jónindegi ýákildiń qyzmetiniń keıbir máseleleri týraly» buıryq jobasyn talqylady. Qazirgi tańda barlyq ortalyq memlekettik organdarda jáne oblys ákimdikterinde Ádep jónindegi ýákilder taǵaıyndalǵan, olar memlekettik qyzmetshilerdiń moraldyq-ádeptilik normalaryn saqtaýyn qadaǵalaýǵa mindettelgen. Ádep jónindegi ýákilderge memlekettik qyzmetshilerge memlekettik qyzmet salasyndaǵy zańnamasynyń talaptaryn saqtaý máseleleri boıynsha konsýltasııalyq kómek kórsetýge, memlekettik qyzmetshilerdiń quqyqtary men zańdy múddelerin qorǵaýǵa jáne ujymdaǵy moraldik-psıhologııalyq jaǵdaıdy zertteýge quzyret berilgen. Qoǵamdyq keńeske óz dárejesinde jumys jasaýdy qamtamasyz etý maqsatynda, sondaı-aq, keńes músheleri bekitilgen kestege sáıkes, apta saıyn azamattarmen jeke qabyldaý ótkizý úshin mınıstrlik tarapynan arnaıy bólme bólindi.
Mınıstrlik janyndaǵy Qoǵamdyq keńestiń qurylý maqsaty – barlyq deńgeıdegi memlekettik organdardyń sheshim qabyldaý úderisinde kommersııalyq emes uıymdardyń jáne jeke azamattardyń keńinen qatysýyn qamtamasyz etý, halyq aldynda esep berýshi memleketti qalyptastyrý saıasatyn júzege asyrý bolyp tabylady. Al keńestiń alǵashqy otyrysy aǵymdaǵy jyldyń 29 aqpanda ótip, onyń tóraǵasy, hatshysy jáne prezıdıým quramy saılanǵan bolatyn.
Aleksandr TASBOLATOV,
«Egemen Qazaqstan».