AQSh Qarjy mınıstriniń málimdeýinshe, eldiń memlekettik qaryzy 14 trıllıon dollarǵa jetken. Ortasha eseppen bul soma el turǵyndarynyń árqaısysyna 45 myń dollardan keledi.
Associated Press agenttiginiń aqparattaryna qaraǵanda, 2010 jyldyń maýsymynda Qarjy mınıstri Tımotı Gaıtner AQSh-tyń memlekettik qaryzy jyl sońyna deıin 13,6 trıllıon dollarǵa jetetinin, al 2015 jylǵa qaraı ol 19,6 trıllıon dollarǵa jaqyndaıtynyn habarlaǵan. Eger naqty sheshimder qabyldanbaıtyn bolsa, bul AQSh ekonomıkasyn defoltqa soqtyrýy múmkin.
EKS-PREZIDENT ELINE ORALDY
Gaıtıdiń burynǵy prezıdenti, dıktator Jan-Klod Dıývale 25 jyldan soń otanyna oraldy. Ol bılikti 20 jasynda óz ákesinen murager retinde alǵan bolatyn.
Aqparat quraldarynyń taratqan aqparattary boıynsha, «Bebı Doka» degen laqap atqa ıe oǵan kezinde jemqorlyqqa salyndy jáne adam quqyǵyn buzdy degen sekildi kóptegen aıyptar taǵylǵan. Bılikten taıdyrylǵannan keıin ol Fransııadan baspana tapty. Birqatar sarapshylardyń pikirinshe, Dıývaleniń eline oralýy jaqynda ótetin prezıdenttik saılaýdyń ekinshi týryna tikeleı baılanysty.
QURBANDYQTAR SANY 630-DAN ASTY
Reseıdiń «Jańalyqtar» aqparat agenttiginiń habarlaýynsha, Brazılııanyń Rıo-de-Janeıro shtatyndaǵy joıqyn topan sý basý jáne jer kóshýi saldarynan keminde 631 adam qurban bolǵan.
Atalǵan shtattyń taýly aımaǵyna ornalasqan birqatar qalalarda jaýǵan nóserdiń sońy alapat tasqynǵa ulasqan. Sonyń saldarynan, ásirese, Nova-Frıbýrgý, Terezopolıs, Sýmıdoýrý jáne Petropolıs qalalary qatty zardap shekken. Qazirgi kezde opat bolǵan adamdardy izdestirý sharalary táýlik boıy júrgizilip jatyr.
TÝNISTE MEMLEKETTIK TО́ŃKERIS JASALDY
«Amerıka daýysy» jańalyqtar qyzmetiniń habarlaýynsha, ótken juma kúni Týnıste memlekettik tóńkeris jasalǵan. Eldi 23 jyl basqarǵan prezıdent Zın ál-Abıdın ben Alı Saýd Arabııasyna qashyp ketken.
Prezıdenttik mindetti aldymen eldiń premer-mınıstri Mohammed Gannýchı ýaqytsha alǵan edi. Buǵan kóterilisshiler qanaǵattanbady. Sodan keıin el bıligi parlament spıkeri Fýed Lebazǵa júkteldi. Keıbir derek kózderine qaraǵanda, tártipsizdikter kezinde adam ólimi bolǵan. Tóńkeristiń túp negizi jumyssyzdyq pen azyq-túlik baǵalarynyń josyqsyz ósirilýinde jatsa kerek.
TÚRKIMENSTANDY BSU-ǴA KIRÝGE ShAQYRDY
Bı-Bı-Sı agenttiginiń habarlaýynsha, bul másele Eýropalyq komıssııanyń tóraǵasy Joze Manýel Barrozý men Túrkimenstan prezıdenti Gýrbangýly Berdymuhamedovtiń Ashǵabadtaǵy kezdesýi kezinde qozǵalǵan.
Eýropalyq komıssııanyń tóraǵasy Túrkimenstan Eýroodaqtyń negizgi saýda áriptesi bolyp tabylatyndyǵyn jáne Túrkimenstannyń BSU-ǵa múshelikke kirýi Eýroodaqpen saýda qatynastaryn jaqsartatynyn atap ótken. Kezdesý barysynda Eýrokomıssııa tóraǵasy Túrkimenstan gazyn Eýropaǵa jetkizýdi bastaýdy tezdetýge shaqyrypty. О́ıtkeni, búginde Eýropa Reseı gazyna óte táýeldi.
LÝJKOVTYŃ LATVIIаDA TURǴYSY BAR
Máskeýdiń eks-meri Iýrıı Lýjkov Latvııaǵa qonys aýdarýdy qolaıly kórip otyr. Latvııa BAQ-tarynyń málimdeýinshe, jańa jyl qarsańynda Máskeýdiń burynǵy basshysy Reseıdegi Latvııa elshiligine Latvııada turý jóninde ótinish bergen kórinedi.
Birqatar aqparattarǵa qaraǵanda, Lýjkovtyń zaıyby Elena Batýrına bul aqparatqa qatysty eshqandaı pikir bildirgen joq. Latvııanyń TV-3 telearnasynyń habarlaýynsha, Lýjkov osy elde turýǵa múmkindik beretin Latvııanyń zańyna sáıkes bul elge 11,4 mıllıon rýblge jýyq qarjy salǵan. Eks-merdiń Latvııada qozǵalmaıtyn múlikteri de bar.
QAITA-QAITA ShAQYRA BASTADY
Ýkraınanyń burynǵy premer-mınıstri, «Batkıvshına» partııasynyń lıderi Iýlııa Tımoshenkony keshe bas prokýratýranyń tergeý basqarmasy taǵy da shaqyrtty.
ForUm agenttiginiń taratqan aqparattaryna qaraǵanda, Iýlııa Tımoshenkony tergeý bas basqarmasynyń tergeýshisi kún saıyn saǵat 10.00-den 17.00-ge deıin ózine qatysty qylmystyq is materıaldarymen tanysýǵa mindettegen. Al eks-premerdiń aıtýynsha, bul is-áreket onyń jumys isteýine jáne qoǵamdastyqpen kezdesýler ótkizýine múmkindik bermeý úshin ádeıi jasalyp otyr. Búginde oǵan 380 mıllıon eýrony maqsatsyz jumsady degen aıyp taǵylǵan.
Internet materıaldary negizinde ázirlendi.