1993 jyldyń 2 sáýirinde Elbasy Nursultan Nazarbaev «Qazaqstan Respýblıkasy Qarýly Kúshteriniń Áskerı-teńiz kúshterin (ÁTK) qurý týraly» Jarlyqqa qol qoıdy. Sol ýaqyttan beri kóp nárse ózgerdi. Qazaqstan flotynyń quramynda tehnıkanyń sońǵy úlgisi boıynsha jabdyqtalǵan otandyq óndiristiń jańa zymyrandyq-artıllerııalyq korablderi paıda boldy.
ÁTK-degi áskerı qyzmetshilerdiń sany da aıtarlyqtaı ulǵaıdy, olardy oqytý jáne jaýyngerlik daıarlaý sapasy arttyryldy. «1993 jyldan bastap 1996 jylǵa deıin Áskerı-teńiz kúshterin qurý úderisi júrdi. Nátıjesinde ÁTK-niń barlyq bólimderin Ulttyq qaýipsizdik komıtetiniń shekara qyzmeti júıesine berý týraly sheshim qabyldandy. ÁTK aýqymynda tapsyrmalardy oryndaý úshin jaǵalaýlyq kúzet jetkilikti sanalatyn. Ýaqyt ótip, meniń oıymsha ataýly kún bolyp esepteletin 2003 jyldyń 7 mamyrynda Áskerı-teńiz kúshteriniń Qazaqstan Respýblıkasy Qarýly Kúshteri túriniń mártebesin alýy týraly qaıta sheshim qabyldandy. Sondyqtan, biz ÁTK-niń eki týǵan kúni bar dep únemi aıtyp júremiz. Ol: 1993 jylǵy 2 sáýir jáne 2003 jylǵy 7 mamyr», – dedi QR QK ÁTK-niń bas qolbasshysy kontr-admıral Jandarbek Janzaqov.
Qyzmettiń sońǵy joǵary kórsetkishteriniń biri 2014 jáne 2015 jyldary ÁTK Qazaqstan Respýblıkasy Qarýly Kúshter túrleriniń arasynda birinshi oryn alǵany, jaýyngerlik daıarlyq deńgeıiniń artqany bolyp tabylady. Eger alǵash qurylýy kezinde Qazaqstannyń áskerı teńizshileri jylyna teńizde 10-20 táýlik bolsa, qazirgi kezde 150-160 táýlik bolady. Kadrlardy daıarlaý deńgeıi jaqsara tústi, mamandarymyz sapaly bilim beretin oqý oryndaryna jiberiledi. Qazirgi kezde áskerı teńizshiler Reseı Federasııasynda, Túrkııada, Germanııada, Qytaıda, Ońtústik Koreıada bilim alyp jatyr. Qazaqstanda kelisimshart negizindegi áskerı qyzmetshiler daıyndalatyn Aqtaý jáne Oral qalalaryndaǵy eki ýnıversıtette áskerı kafedra jáne ÁTK-niń oqý-jattyǵý ortalyǵy jumystaryn júzege asyryp otyr.
Qazirgi ýaqytta QR QK ÁTK-niń jaraqtandyrýynda zamanaýı zymyrandyq-artıllerııalyq korablder, shaǵyn kúzet kemeleri men katerler tur. Jaqyn arada osy arsenaldy tolyqtyra túsetin sý jańa «Alataý» mına-tartqysh korabli keledi dep kútilýde. Onyń iske qosylýy Qazaqstan Áskerı-teńiz kúshteriniń jaýyngerlik qabilettiligin arttyrýǵa yqpal etetin bolady.
«Egemen-aqparat».