Alaý – Aqtaýda!

Elimizde tuńǵysh ret ótetin Azıada alaýy 15 qańtar kúni túnde Qyzylordadan Aqtaýǵa jetti. Qalanyń halyqaralyq áýejaıynda Alaý Kýbogyn ob­lys basshylary, jurtshy­lyq ókilderi saltanatty túrde qýa­na qarsy aldy. Mańǵystaýlyqtar el táýel­siz­diginiń 20 jyldyǵy aıasynda ótkiziletin VII Qysqy Azııa oıyn­­­darynyń Alaý estafetasyn qa­byldaýǵa daıyndyqty erte bas­ta­dy. Ásem Aqtaýdyń orta­lyq alań­dary men kári Kaspıı ja­ǵalaýy dostyq, birlik, sala­mat­ty ómir salty men sportty na­sı­hattaıtyn kórinisterge to­lyp, kórkemdele tústi. Ony 16 qań­tar­daǵy ásem áýen, ashyq aýa, kó­terińki kóńil-kúı odan ári kórik­tendire tústi. Saǵat 11.00-de Alaý estafetasy qala­nyń qasıetti oryndarynyń biri sa­nalatyn «Máń­gilik alaý» aldyn­da bastal­dy. Aqtaý as­pa­nynda án qa­lyq­tady. Olar B.Nádirov­tiń «Tý­ǵan jer», S.Nurǵo­jaevtyń «Mańǵys­taý», B.Otara­lıevanyń «Jasa Qazaq­stan!», E.Ha­sanǵalıevtiń «Ata­mekeni» edi. Saǵat 12.00-de oblys ákiminiń birinshi orynbasary Aman­­geldi Aıtqulov jınalǵan­dar­dy el tarı­hyndaǵy erekshe oqıǵa­men qut­tyq­tady. Al Alaý estafe­tasy dı­rek­­sııasy jetekshi­siniń oryn­basary Naıl Nurov alystaǵy Ál-Kýveıt­ten jetken alaý kýbogyn oǵan saltanatty túrde tabys etti. A.Aıtqulov Azıada alaýyn Mańǵystaýda alǵashqy bolyp alyp júrý úshin QR-nyń eńbek sińirgen sport sheberi, bokstan álemniń, Azııanyń, Qazaqstannyń chempıony Erdos Jańabergenovke tapsyrdy. Alaýgerler sherýi bas­taldy. «Máń­gilik Alaý» aldyn­da bastaý alǵan sherý 12 shaqyrymǵa sozyldy. Al Azıada alaýyn alyp júrýge 60 mańǵystaýlyqtar tań­daldy. Olar­dyń arasynda álem­niń, Azııanyń, Qazaqstannyń chem­pıondary N.Solodılova, A.Kolontaev, S.Oleshko, T.Kýdrıavseva, N.Kýlyshov, M.Kýrýglıev, ataqty jeńil atlet KSRO-ǵa eńbek sińir­gen sport sheberi Á.Tuıaqov, sport mesenaty, Azııa kara­te-do asso­sıa­sııasynyń prezıdenti S.Abdýllaev, óner jáne máde­nıet qaı­ratkerleri R.Madreev, T.Asar, A.Jemeneı, t.b. bar. Osyndaı quramy bar sherýshiler toby alaýdy avto­kólik­pen de, atpen de, qol arbamen de, jaıaý júrip te qoldan-qolǵa tap­syryp, Táýelsizdik alańy arqy­ly ótken jyly paıda­la­nýǵa berilip, osy jazda Elbasy jumy­sy­na oń baǵa bergen «Aq­taý» saýda-demalys ke­shenine ekinshi kezeńdi jalǵas­tyr­dy.  Onda ka­rate-dodan Azııa­nyń, Qazaq­stan­­nyń jastar ara­syn­daǵy chem­pıony H.Halıdov alaý­dy qol dobyn otyryp oı­naý­dan respýblıka chempıony A.Shaımar­danov­qa tapsyrdy. «Al­ǵa Qazaqstan!», «Birligimiz jasa­syn!» dep uran­datqan sherýshiler odan ári «Mu­naıshy» stadıony arqyly qala­nyń sha­ǵyn aýdan­daryn teńiz ja­ǵalaý­lary arqyly júrip ótti. Jáne de sol sátterde «Azıada-11» atty dúbir­li dodada sport­shylarymyzdyń mereıi ústem bolyp, Táýelsiz Qazaq eliniń kók baıraǵy jıi-jıi jelbireı kó­terilýine tilektestik aq nıetterin arnady. Asqan uıymshyldyqpen zor órleý ústinde ótken Alaý esta­fetasy qas qaraıa Astana ala­ńynda Uly Abaı atyndaǵy mádenıet kesheni janynda aıaqta­lyp, merekelik gala-konsertke jalǵasty. Jolaman BOShALAQ. Mańǵystaý oblysy.