Kembrıdjden kelip dáris oqydy

Keshe Ulttyq akademııalyq kitap­hanada parsy ádebıetiniń kórnekti ókili, aqyn Fırdoýsıdiń «Shahnama» dastanyna arnalǵan semınar ótti. Semınar jumysyna «Shahnama» Kembrıdj ortalyǵynyń parsy zertteýleri boıynsha je­tekshisi (Kembrıdj ýnıversıteti) Fırýza Mel­vıll (Abdýllaeva) jáne atalǵan oqý ornynyń professory, tarıhshy Melvıll Charlz Peter qatysyp, «Shahname» taqyrybynda dáris oqydy. Jıyn barysynda Ulttyq akademııalyq ki­taphana men Kembrıdj ýnıversıtetiniń ara­syndaǵy ǵylymı jobalar, birlesken konferensııalar, kitap kórmeleri, dóńgelek ústelder, dáristik kýrstar, kitap shyǵarý salasyndaǵy ózara yntymaqtastyq máseleleri talqylandy. Fırýza Melvıll (Abdýllaeva) men Melvıll Charlz Peter Ulttyq kitaphanadaǵy sırek basylymdar jáne qoljazbalar toptamasymen tanysyp, qorda saqtalǵan kitaptardyń tarıhynan mańyzdy maǵlumattar aldy. Sheteldik professorlar elimizge Qazaqstan Respýblıkasynyń Ulybrıtanııadaǵy elshiliginiń qoldaý kórsetýi nátıjesinde, sondaı-aq, Mádenıet jáne sport mınıstrliginiń, sonymen birge, Ulttyq akademııalyq kitaphananyń shaqyrýymen arnaıy kelgenin esterińizge salamyz. Bul basqosý Ulttyq kitaphana basshysy Úmit­han Muńalbaevanyń Ulybrıtanııa kitap­ha­nalaryna jasaǵan jumys saparynyń arqasynda júzege asqanyn aıta ketsek deımiz. Ekijaqty yntymaqtasý perspektıvalaryn talqylaý maq­satynda Kembrıdj ýnıversıtetiniń professorlary aldaǵy ýaqytta Halyqaralyq túr­ki akademııasyna, Nazarbaev Ýnıversıtetke jáne L.N.Gýmılev atyndaǵy Eýrazııa ulttyq ýnıversıtetine de barýdy josparlap otyr. Raýan QAIDAR, «Egemen Qazaqstan».