«Ádildik sottarda ǵana saltanat qurýy tıis» degen Elbasynyń sózi sońǵy kezderi shyndyqqa ulasa bastaǵany aıqyn ańǵarylyp otyr. Alaıda sottardyń da soty bar demekshi, elimizdiń Joǵarǵy Soty bolmasa, ádildiktiń aýyly áli de alystaı berer me edi, kim biledi. Buǵan dálelder de tabylyp jatyr. Máselen, Joǵarǵy Sottyń baspasóz qyzmeti habarlaǵandaı, elimizdiń Joǵarǵy Soty Astana qalasy, Almaty jáne Aqtóbe oblysy sottarynyń burynyraqta shyǵarǵan úsh sot aktisiniń kúshin joıyp, «METRO Kesh end Kerrı» JShS-niń talap aryzyn qanaǵattandyrdy. Mine, osylaısha, jalpy somasy 107 488 739 teńge quraıtyn ımporttyq keden alymyn, qosymsha qun salyǵy men ústemeaqyny qosý týraly keden organdarynyń habarlamasy zańsyz dep tanylyp, kúshi joıyldy. Áıtpese, jaǵdaı múlde basqasha órbıtin edi.
Al atalǵan daýdyń baıybyna keler bolsaq, «METRO Kesh end Kerrı» JShS 2012 jylǵy 6 qańtardaǵy keshendi kásipkerlik lısenzııa (franchaızıng sharty) boıynsha Qazaqstanda qyzmet ete júrip, 2011-2014 jyldary syrttan ákelingen taýarlarǵa tólem jasaý kezinde 724 032 040 teńge kóleminde kedendik qundy qospaǵan. Bul jaǵdaı Almaty qalasy boıynsha kedendik baqylaý departamenti júrgizgen tekseris nátıjesinde anyqtalyp, ımporttalatyn taýarlardyń kedendik quny túsirilgen degen qorytyndy jasaǵan. Bul, óz kezeginde, Astana qalasy, Aqtóbe jáne Almaty oblystary boıynsha 107 488 739 teńge kóleminde kedendik tólemder, salyqtar men ózge de ústemeaqylarǵa qosymsha aqynyń qosylýyna alyp kelgen.
Deı turǵanmen, Keden odaǵynyń keden shekarasy arqyly tasymaldanatyn taýarlardyń kedendik qunyn anyqtaý týraly 2008 jylǵy 25 qańtardaǵy Kelisimniń 5-babynyń 1-tarmaǵynyń 7-tarmaqshasyna sáıkes syrttan ákelinetin taýarlardyń kedendik qunyna lısenzııalyq tólemderdi qosý sharttaryna olardyń syrttan ákelinetin taýarlar bolyp tabylatyndyǵy jáne baǵalanatyn taýarlardy satý sharty retinde tikeleı nemese janama bul tólemderdi tóleý nemese tóleý qajettiligi jatady.
Sondaı-aq, «METRO Kesh end Kerrı» JShS-niń syrttan ákeletin taýarlardyń kedendik qunyna tólemderdi júrgizý shartynyń joqtyǵy isti qaraý barysynda anyqtalyp, tıisti materıaldarmen rastalǵan. Onyń ústine derbes taýarlyq belgilerdi qoldanǵany úshin lısenzııalyq tólemder aýdarylmaǵan jáne atalǵan seriktestik tarapynan naqty tólenbegen kórinedi.
Aleksandr TASBOLATOV,
«Egemen Qazaqstan».