ASTANA. 13 sáýir. Astanadaǵy demalys oryndarynyń birine aınalǵan «Dýman» oıyn-saýyq ortalyǵy satyldy. Bul týraly 24.kz-ke silteme jasaǵan egemen.kz tilshisi habarlady. Elorda turǵyndary men qonaqtarynyń súıikti demalys ornyna aınalǵan keshen elektrondy saýda arqyly 3 mlrd 403 mln 500 myń teńgege ótti. Otyz myń sharshy metrge jýyq aýmaqty alyp jatqan nysanǵa ıelik etýge eki ótinish túsken. Buǵan deıin ol Astana ákimdigi kommýnaldyq múlik jáne memlekettik satyp alý basqarmasynyń esebinde turǵan. Baıqaý sharttaryna sáıkes, «Dýmannyń» kóńil-kóterý qyzmetteri keminde 10 jylǵa saqtalýy tıis. Okeanarıým sonsha ýaqyt qyzmet etýi shart. Al jasandy teńiz ben nysannyń ózi jańartylyp, shatyry jóndelýi qajet. «Qazir satyp alý kelisimshartyna qol qoıylyp jatyr. Aıaqtalǵannan keıin alǵan adam óz atyna tirkeıdi. Eki kompanııa ótinish bildirip, baǵany joǵary qoıǵan adamǵa oıyn-saýyq ortalyǵy satyldy. Aıta keteıik, el úkimeti 2016-2020 jyldarǵa jekeshelendirýdiń keshendi josparyn quryp, satylymǵa qoıylatyn ulttyq holdıngter men iri kompanııalardyń tizimin jarııalaǵan bolatyn», – dedi Astana qalasy kommýnaldyq múlik jáne memlekettik basqarý basqarmasynyń bólim basshysy Ulan Qudaıbergen. Talǵat Raıymbek. Derek: 24.kz. Foto: friends.kz.