«Aq joldyń» 10 tomy

oqyrmanǵa jol tartty Alash partııasynyń qaıratkerleri týraly búginde az jazylyp júrgen joq. Byltyr ǵana 100 jyldyǵyn atap ótken, ısi qazaqtyń, Ahmet Baıtusynov sózimen aıtqanda, «kózi, qulaǵy hám tili» bolyp tabylǵan «Qazaq» gazeti jabylǵan soń, 1920-1926 jyldary Tashkentte «Aq jol» gazeti ashylyp, oqyrmanǵa jol tartqan bolatyn. Jaqynda osy gazettiń jınaqtalǵan nusqasy «Qazaqparat» baspasynan 10 tom kitap bolyp shyǵyp, respýblıka bo­ıynsha kitaphanalar men oqý oryndaryna taratyldy. Ony qazirgi emlege aýdaryp, baspaǵa ázirlegen – halyqaralyq «Alash» syılyǵynyń laýreaty, Shymkenttegi Saıası qýǵyn-súrgin qurbandaryna ar­nalǵan mýzeıdiń dırektory, ótkir minez, otty óleńderimen tanylǵan aqyn Hanbıbi Esenqaraqyzy bolatyn. Sondaı-aq, 1922-1923 jyldary ne­bári 8 sany jaryq kórgen «Sholpan» (qa­zirgi «Juldyz») jýrnalynyń da to­lyq sany jaryq kórdi. Bul jýrnal О́zbekstannyń arhıvinen tabylsa, «Aq jol» gazeti – Almaty, Tashkent, Más­keý muraǵattarynan talmaı izdený nátı­je­sinde qolǵa tıip otyr. Hanbıbi Esenqaraqyzy alǵashynda «Aq joldyń» 10 kitabyn óz kúshimen shyǵara bastaıdy. Ary qaraı múmkindigi jetpeıtinin baıqap, Mádenıet jáne sport mınıstri Arystanbek Muhamedıulyna kelip, jaǵdaıdy aıtady. Nebári úsh adamnyń osynshama qyrýar eńbekti jasaǵanyna tańdanǵan mınıstr: «Mynaý bir ǵylymı-zertteý ınstıtýtynyń atqaratyn jumysy ǵoı, biz muny memleket esebinen shyǵaratyn bolamyz!» – dep ýáde etedi. Aıtqanyndaı-aq, mınıstrliktiń «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha «Sholpan» men «Aq joldyń» 10 tomyn 22 myń dana taralymmen basylyp shyǵýyna yqpal etedi. Bıyl Táýelsizdigimizdiń 25 jyldyǵy qarsańynda «Aq jol» gazetiniń arhıvten tabylyp jınaqtalǵan materıaldary budan basqa taǵy 10 tomǵa júk bolmaq. Al barlyǵyn qosqanda keleshekte 30 tomdy quraıdy dep josparlap otyr aqyn, zertteýshi Hanbıbi Esenqaraqyzy. Raýshan TÁÝIRHANQYZY, «Egemen Qazaqstan». ShYMKENT.