QAZAQSTAN RESPÝBLIKASYNYŃ PREZIDENTI NURSULTAN NAZARBAEV PEN TÚRKIIа RESPÝBLIKASYNYŃ PREZIDENTI REDJEP TAIIP ERDOǴANNYŃ ISLAM ÁLEMINDEGI TATÝLASTYQ JО́NINDEGI BIRLESKEN DEKLARASIIаSY

Bul Deklarasııa eki el kóshbasshylary kelissózderiniń qorytyndysy boıynsha qabyldandy. Memleketter basshylary qujatta halyqaralyq beıbitshilik pen qaýipsizdikti qoldaýǵa jáne memleketter arasyndaǵy dostyq qarym-qatynastardy damytýǵa baǵyttalǵan qaǵıdattardy berik ustanatynyn rastady. Sonymen qatar, Nursultan Nazarbaev pen Redjep Erdoǵan Islam Yntymaq­tas­tyǵy Uıymyna múshe elderdi memle­ket­aralyq qatynastarda jáne qaqtyǵystar men daýlardy retteý máselelerinde izgi nıet pen erik-jiger tanytý jáne syndarly qadam jasaý arqyly ıslam álemindegi qarym-qatynastyń jańa paradıgmasyn qalyptastyrýǵa shaqyrdy. Qazaqstan Respýblıkasynyń Prezı­denti Nursultan Nazarbaev pen Túrkııa Res­pýb­lıkasynyń Prezıdenti Redjep Taııp Erdoǵan 2016 jylǵy 14-15 sáýir araly­ǵynda Ystanbul qalasynda ótetin Islam Yntymaqtastyǵy Uıymynyń 13-shi Islam sammıti konferensııasy qarsańynda ótken Qa­zaqstan Respýblıkasynyń Prezı­denti Nursultan Nazarbaevtyń Túrkııa Res­pýblıkasyna 2016 jylǵy 13 sáýirdegi jumys sapary aıasyndaǵy ekijaqty kelissózderdiń qorytyndysy boıynsha, 2009 jylǵy 22 qazanda qol qoıylǵan Qazaqstan Respýblıkasy men Túrkııa Respýblıkasy arasyndaǵy Strategııalyq áriptestik týraly kelisimdi basshylyqqa ala otyryp, barlyq saıası, ekonomıkalyq jáne áleýmettik aspektilerdi qamtıtyn  jan-jaqty áriptestikti, sondaı-aq, ortaq tarıhı jáne mádenı baılanystardyń negizinde qalyptasqan Qazaqstan men Túrkııa halyqtary jáne azamattyq qoǵamdary arasyndaǵy tyǵyz qarym-qatynastardy ilgeriletý maqsatyn kózdeı otyryp, Qazaqstan men Túrkııa arasyndaǵy ekijaqty qarym-qatynastardy jáne yntymaqtastyqty odan ári damytýda mańyzdy ról atqaratyn joǵary deńgeıdegi ózara saparlar men saıası konsýltasııalardy udaıy ótkizýge jáne qoldaýǵa beıildilik tanyta otyryp, halyqaralyq beıbitshilik pen qaýip­sizdikti qamtamasyz etýge, sonymen birge memleketter arasyndaǵy dostyq baı­­lanystar men yntymaqtastyqty damy­týǵa baǵyttalǵan Birikken Ulttar Uıy­my Jar­ǵysynyń jáne Islam Yntymaq­tas­tyǵy Uıymy Jarǵysynyń maqsattary men qaǵıdattaryna beıildiligin rastaı otyryp, jahandyq qaýip-qaterlerge, ekonomı­kalyq problemalarǵa, konfessııalar men ór­kenıetter arasyndaǵy qarama-qaıshy­lyq­tarǵa, lańkestik pen uıymdasqan qyl­­mys qaterleriniń teńdessiz dárejede ósýi­ne, sondaı-aq, mıgrasııa, kedeıshilik prob­le­malaryna qarsy turýdaǵy birlesken is-áre­ketterdiń qajettiligin túsine otyryp, halyqaralyq qatynastardyń shapshań transformasııasynyń epısentrinde qalyp otyrǵan ıslam áleminiń shıelenisterge toly memleketaralyq qatynastardyń nasharlaýy, sondaı-aq, memleketter arasyndaǵy yntymaqtastyq deńgeıiniń tómendeýi sekildi problemalar oryn alǵan kezeńdi basynan keshirip jatqanyn moıyndaı otyryp, ıslam úmbetiniń tutastyǵyna qaýip tóndiretin jáne ıslam birligine zııan keltiretin birqatar jetekshi musylman elderi arasyndaǵy teketiresterdiń kúsheıip kele jatqanyna alańdaýshylyq bildire otyryp, sheshimin tappaǵan tarıhı problemalar, turaqsyzdyq, lańkestikke qarsy kúres musylman elderiniń damý maqsattaryna jumsaýǵa bolatyn orasan zor resýrstaryn zaıa ketirip jatqanyn ataı otyryp, ár memlekettiń kez kelgen basqa mem­lekettiń ishki isterine aralaspaý jónindegi min­dettemesi halyqtardyń ózara beıbit ómir súrýin qamtamasyz etýdiń mańyzdy shar­ty bolyp tabylatynyna kámil sene otyryp, barlyq memleketter úshin halyqaralyq beıbitshilik, qaýipsizdik jáne ádilettilikke qaýip tóndirmeı, ózderiniń shıelenisterin Birikken Ulttar Uıymynyń Jarǵysyna sáıkes beıbit jolmen sheshý ortaq mańyz­dylyqqa ıe ekendigin eskere otyryp, álem halyqtarynyń beıbit jáne gúl­dengen bolashaǵy úshin óz jaýapkershiligin sezine otyryp jáne memleketter men halyqtar arasyndaǵy dostyq qarym-qatynastardy ilgeriletý, olardyń qaýipsiz jáne beıbit ómir súrýin qamtamasyz etýge nıetin basshylyqqa ala otyryp, halyqaralyq qatynastardaǵy tózim­diliktiń mańyzdylyǵyn, ózara túsinistikke jetýdiń, beıbitshilikke tónetin qaterlerdi joıýdyń jáne yntymaqtastyqty nyǵaıtýdyń quraly retindegi dıalogtyń eleýli rólin ataı otyryp, ıslam áleminiń túrli óńirlerinde oryn alyp otyrǵan saıası, ekonomıkalyq jáne gýmanıtarlyq problemalar aıasynda Túrkııa Respýblıkasynyń Ystanbul qa­lasynda Islam Yntymaqtastyǵy Uıymy 13-shi Islam sammıti konferensııasy ótkizilýiniń mańyzdylyǵyn ataı otyryp, 13-shi Islam sammıti konfe­ren­sııa­synyń «Ádilettilik pen beıbitshilik, birlik pen yntymaqtastyq úshin» taqyrybyn nazarǵa ala otyryp, tómendegideı ýaǵdalastyqtarǵa qol jetkizdi: Memleketter shekaralarynyń myz­ǵym­astyǵy, aýmaqtyq tutastyq pen ege­mendikti qurmetteý, basqa memleketterdiń ishki isterine aralaspaý, memleketaralyq qatynastardaǵy daýlar men qaqtyǵystardy beıbit kelissózder arqyly sheshý jónindegi Birikken Ulttar Uıymynyń jáne Islam Yntymaqtastyǵy Uıymynyń basty qaǵıdattaryn rastaımyz. Islam birligi rýhyna berikti­gimiz­di taǵy da rastaımyz jáne Islam Yn­ty­maqtastyǵy Uıymyna múshe memleketterdi memleketaralyq qatynastarda jáne ózara qaqtyǵystar men daýlardy sheshý jolynda izgilik pen syndarly ustanym tanytý arqyly ıslam álemindegi qatynastardyń jańa paradıgmasyn qalyptastyrýǵa shaqyramyz. Islam Yntymaqtastyǵy Uıymyna múshe memleketterdi eń aldymen ortaq qundylyqtar men múddelerge basty nazar aýdara otyryp, ıslam álemindegi memleketaralyq problemalarǵa revızııa jasaý úderisin bastaýǵa shaqyramyz. Islam Yntymaqtastyǵy Uıymyna múshe memleketterdi Islam álemindegi tatýlasý úderisin qoldaýǵa jáne ony taıaý jyldardaǵy ıslam úmbetiniń jańa saıası tuǵyrnamasy retinde qarastyrýǵa shaqyramyz. Birikken Ulttar Uıymynyń jáne Islam Yntymaqtastyǵy Uıymynyń halyqaralyq qaqtyǵystardyń aldyn alýdaǵy jáne olardy beıbit joldarmen she­shýdegi jetekshi rólin, sondaı-aq, Is­lam Yntymaqtastyǵy Uıymynyń ıs­­lam álemindegi tatýlasý úderisin ilge­ri­le­týdegi basqa halyqaralyq jáne óńir­lik uıym­darmen yntymaqtastyǵyn qoldaı­myz. Islam álemindegi tatýlasý úderi­sin ilgeriletý mindetin Islam Ynty­maq­tastyǵy Uıymyna júkteýdi usynamyz jáne bas­tamanyń maqsattaryna qol jetki­zýge baǵyttalǵan usynystardy daıyndaý maqsatymen Islam Yntymaq­tastyǵy Uıymy Bas hatshysynan osy saladaǵy jaǵdaıǵa tereń taldaý jasaýdy suraımyz. Islam álemindegi tatýlasý taqy­ry­byn Islam Yntymaqtastyǵy Uıymy Syrtqy ister mınıstrleri keńesiniń jáne Memleket pen úkimet basshylary sam­mıt­teri otyrystarynyń kún tártibin­degi turaqty máselesi retinde bekitýdi usynamyz. Islam Yntymaqtastyǵy Uıymyna múshe memleketterdi halyqaralyq qaty­nas­tardaǵy shıelenisti báseńdetý úshin naqty qadamdar jasaý jáne qordalanǵan prob­lemalardy túrli konsýltasııa tetikterin qalyptastyrý jolymen sheshý, dıplomatııalyq mıssııalardyń, parlamentaralyq dıalogtardyń, úkimettik emes uıymdardyń áleýetin qoldaný arqyly ıslam álemindegi tatýlasý bastamasyn naqty is júzine asyrý úshin úles qosýǵa shaqyramyz. 2016 jylǵy 13 sáýir, Ystanbul