Kóshet urlap dánikkender

Shymkenttegi demalys ornyna zııanyn tıgizdi Sońǵy jyldary Shymkent qalasy adam tanymastaı ózgerdi. Bu­ryn dendroparkke barǵan adam ıt tumsyǵy batpas taıgaǵa kirip ket­kendeı bolatyn edi. Túnge qalyp ketseń, kózge túrtse kórgisiz qarańǵylyq qarmap, shyǵar esikke jetkenshe ımanyń qasym bolatyn. Búginde sol dendrobaq – shym­kenttikter men qala qonaqtarynyń myń kórse kózi toımaıtyn qyzyǵy. Ári qaraı «Qazyna» etnokesheni iske qosylyp, shymqalanyń shyraıyn ashqan. Alaıda, adamdardyń bári birdeı emes. El ıgiligi úshin egilgen sándik kóshetterdi aısyz túnde jortatyn qorqaýlar qazyp áketip jatyr. «Qazyna» etnokesheni qalanyń kórki edi. Tek osy jerdiń ózinen quny 240 myń teńge turatyn tórt arsha urlanǵan. Ár arshanyń quny 60 myń teńge ekendigin eskerseńiz, kóshet­terdi urlap júrgender – kól­deneń kók atty emes, baǵasyn biletinder. «Jeńis» saıabaǵynda da birtalaı kóshet túp-tamyrymen qazylyp alynǵan. Shymkent qalalyq TÚKSh bólimi basshysynyń mindetin atqa­rýshy Nurlan Bekturǵanov búginge deıin keltirilgen shyǵynnyń 400 myń teńgeden asqandyǵyn aıtady. Qazir Ońtústik Qazaqstan oblystyq ishki ister departamentiniń polıseıleri Qylmystyq kodekstiń 188-baby bo­ıynsha qylmystyq is qozǵady. Mem­leket múlkine qaraýlyq jasaǵan kór­tyshqandardyń inine sý quıyp, el-jurtqa masqaralamasa, ońaı oljaǵa dánikkender nıetinen taıynatyn emes. Baqtııar TAIJAN, «Egemen Qazaqstan»