Keshe Ortalyq kommýnıkasııalar qyzmetiniń baspasóz zalynda elimizdiń týrıstik salasyn odan ári damytýǵa negizdelgen konkýrstyń bastalýyna baılanysty baspasóz máslıhaty bolyp ótti. Jıynǵa Halyqaralyq hatshylyq «G-Global» bastyǵynyń orynbasary Saltanat Rahymbekova, Qazaqstan Týrıstik ındýstrııa ulttyq odaǵynyń atqarýshy dırektory, halyqaralyq uıym «Expo&Women» AQ Basqarmasynyń tóraıymy Gaýhar Jeńisbek, Qazaqstan Týrıstik ındýstrııa ulttyq odaǵynyń tóraıymy Inna Reı qatysyp, týrızm salasynda tuńǵysh ret uıymdastyrylyp otyrǵan saıystyń mán-mańyzyna toqtalyp, talaptarymen tanystyryp ótti.
«Týrızm – ekonomıkanyń quramdas bóligi. BUU Búkilálemdik týrıstik uıymynyń málimeti boıynsha, týrızm salasy álemde jalpy ishki ónimniń onnan bir bóligin qamtamasyz etedi. Qazaqstan tabıǵı resýrstarǵa baı, halyqaralyq naryqtaǵy týrızm salasy jyl saıyn damyp kele jatqan memleket. Bizdiń bul konkýrsty ótkizýdegi basty mindetimiz týrızmniń damýyn odan ári jetildirý, isker kompanııalardy izdeý jáne jańasha baǵdarlamalar baǵytyn qarastyrý bolyp tabylady. Jarysqa qatysýshylar 12 atalym boıynsha synǵa túsedi. Olardyń ishinde, «Oqıǵalyq týrızmniń úzdik jobasy», «Úzdik ulttyq týrıstik kompanııa», «Úzdik aımaqtyq týrıstik kompanııa», «Úzdik gıd-saıahatshy», «Úzdik shıpajaı», «Qonaqúı ındýstrııasynyń úzdik nysany», «Qazaqstan boıynsha saıahattaýdyń úzdik baǵyttary», «Úzdik balalar demalysy», «Týrısterge arnalǵan úzdik ınternet-servıs», «Týrızmdi baıandaý jónindegi úzdik buqaralyq aqparat quraly», «Týrızm boıynsha úzdik TD joba» atalymdary bar», – dedi Qazaqstan Týrıstik ındýstrııa ulttyq odaǵynyń atqarýshy dırektory Gaýhar Jeńisbek.
Sonymen qatar, konkýrstyń nátıjelerin ádil baǵalaý úshin «Saraptyq keńes» qurylyp, onyń quramyna memlekettik organdar, qyzmetkerleri qoǵam qaıratkerleri, týrıstik salanyń mamandary shaqyrylyp otyrǵanyn da esterińizge salamyz. Al, júzden júırik, myńnan tulpar shyqqan jeńimpazǵa «Keń Dala» ulttyq syılyǵy beriletin bolady.
Raýan QAIDAR,
«Egemen Qazaqstan»