13-14 sáýir kúnderi О́zbekstannyń astanasy – Tashkent qalasynda Shanhaı yntymaqtastyq uıymyna múshe memleketter Qaýipsizdik keńesteri hatshylarynyń 11-shi kezdesýi bolyp ótti. Kezdesýge Prezıdenttiń kómekshisi – Qaýipsizdik Keńesiniń hatshysy Nurlan Ermekbaev qatysty.
ShYU keńistiginde qaýipsizdik salasyndaǵy jaǵdaı týraly pikir almasýlar ótip, terrorızmmen, separatızmmen jáne ekstremızmmen, qarý-jaraq pen esirtkiniń zańsyz aınalymymen kúreste ózara is-qımyldardy jetildirýdiń tetikteri, transshekaralyq uıymdasqan qylmyspen kúres jaıy jan-jaqty talqylandy.
Qazaqstan delegasııasynyń basshysy kezdesýge qatysýshylardy bizdiń memleketimiz tarapynan ShYU jelisi boıynsha atalǵan baǵyttarda qabyldanyp jatqan sharalar, sondaı-aq, Shanhaı yntymaqtastyq uıymyna múshe memlekettermen ekijaqty yqpaldastyq sheńberinde qabyldanyp jatqan is-sharalar týraly qulaǵdar etti.
Delegasııalar basshylary О́zbekstan Respýblıkasynyń Prezıdenti Islam Kárimov tarapynan qabyldaýda boldy.
Sondaı-aq, Tashkentte N.Ermekbaevtyń О́zbekstan Respýblıkasy Prezıdentiniń janyndaǵy Qaýipsizdik keńesiniń hatshysy V.Mahmudovpen, Qytaı Halyq Respýblıkasy Memlekettik keńesiniń múshesi – Qytaıdyń Qoǵamdyq qaýipsizdik mınıstri Go Shenkýnmen kelissózderi ótti.
Atalǵan kezdesýler barysynda taraptar qaýipsizdik salasyndaǵy ózara is-qımyldyń naqty máselelerin talqylady.
Qaýipsizdik keńesi hatshylarynyń kezdesýinde ústimizdegi jyldyń 23-24 maýsymynda Tashkent qalasynda bolatyn ShYU-ǵa múshe memleketter basshylary keńesiniń májilisine materıaldar daıyndaý máselesine erekshe nazar aýdaryldy.
«Egemen-aqparat»