Ol bıyl da áıgililerdiń basyn qospaq
Prezıdent janyndaǵy Ortalyq kommýnıkasııalar qyzmetinde ótken baspasóz málıhatynda aldaǵy 24-26 mamyrda ótetin Astana ekonomıkalyq forýmy týraly aıtyldy. Oǵan «Ekonomıkalyq zertteýler ınstıtýty» AQ basqarma tóraǵasy Áset Erǵalıev qatysty.
«AEF-tyń basty taqyryby – «Jańa ekonomıkalyq aqıqat: ártaraptandyrý, ınnovasııalar jáne bilim ekonomıkasy». Atalmysh taqyryp sheńberinde álemdik ekonomıkany damytýdyń negizgi úrdisteri men syn-tegeýrinderi, sonymen qatar, jańa ekonomıkalyq aqıqat dáýirinde uzaq merzimdi ekonomıkalyq ósýmen qamtamasyz etý máseleleri talqylanady», dedi Á.Erǵalıev. Onyń aıtýynsha, forým jahandyq ekonomıkany ornyqty damytýdyń syn-tegeýrinderi men táýekelderin, álemdik qarjy-ekonomıkalyq júıeniń qazirgi máselelerin sheshý joldaryn talqylaý úshin jetekshi halyqaralyq sarapshylar, bıznes pen memleket ókilderiniń úlken tobyn biriktiretin aýqymdy alań bolyp tabylady.
Jyl saıynǵy Astana ekonomıkalyq forýmy Qazaqstan Respýblıkasynyń Prezıdenti Nursultan Nazarbaevtyń bastamasy boıynsha ótkizilip keledi. Forým bıyl toǵyzynshy márte ótkizilmek.
Bıylǵy jyly da oǵan ádettegideı bıznes jáne saraptaý qaýymdastyqtarynyń álemge tanymal ókilderi, iri qarjylyq qurylymdardyń jetekshileri, halyqaralyq uıymdardyń basshylary, Nobel syılyǵynyń laýreattary qatysady dep kútilýde. Olardyń qatarynda ǵalamtor-kommersııa salasynda qytaılyq AliBaba Group kompanııasynyń negizin qalaýshy Djek Ma, HVQ basqarýshy-dırektory Krıstın Lagard, EQDB prezıdenti Sýma Chakrabartı, brıtandyq «The Economist» jýrnalynyń nusqasy boıynsha álemdegi eń bedeldi ekonomısterdiń úshtigine kiretin Kolýmbııa ýnıversıteti Jer ınstıtýtynyń dırektory Djeffrı Saks, Massachýsets tehnologııalyq ınstıtýtynnyń ekonomıka professory, «Why Nations Fail: The Origins of Power, Prosperity, and Poverty» álemdik bestselleriniń avtory Daron Adjemoglý, AQSh-tyń burynǵy prezıdenti Ronald Reıgannyń jáne Ulybrıtanııa premer-mınıstri Margaret Tetcherdiń burynǵy keńesshisi Artýr Laffer, Leontev syılyǵynyń laýreaty Ha-Djýn Chang, «Valıýtalyq soǵystar» bestselleriniń avtory Sýn Hýnbın, sondaı-aq, ekonomıka salasy boıynsha Nobel syılyǵynyń laýreattary Edvard Preskott, Krıstofer Pıssarıdes pen Tomas Sardjent bar.
«Bıylǵy jyly plenarlyq otyrys negizgi sharadan alǵash ret jekeleı «Qazaqstan» ortalyq konsert zalynda ótkizilmek. Al forým aıasyndaǵy basqa jıyndar burynǵydaı Táýelsizdik saraıynda bolady. Forým sheńberinde 20-ǵa jýyq is-shara josparlanǵan. Onyń qatarynda dúnıejúzine tanymal «The Economist» halyqaralyq bedeldi jýrnalymen birlese uıymdastyrylatyn Qazaqstan ınvestısııalyq sammıtin, Boao azııalyq forýmy hatshylyǵymen birlese uıymdastyrylatyn Uly Jibek joly elderiniń forýmyn, «The Financial Times» halyqaralyq bedeldi basylymymen birlese ótkiziletin jekeshelendirý jónindegi Qazaqstan forýmyn aıryqsha atap ótýge bolady, dedi «Ekonomıkalyq zertteýler ınstıtýty» AQ basqarma tóraǵasy.
Sondaı-aq, ol AEF-2016 qarsańynda 24 mamyr kúni HVQ basqarýshy-dırektory Krıstın Lagard jáne Ortalyq Azııa, Kavkaz jáne EAEO-ǵa múshe elder úkimetteriniń qatysýymen HVQ aımaqtyq forýmy ótetindigin jetkizdi. Sonymen qatar, forým aıaqtalǵan soń, kelesi kúni Qazaqstan Respýblıkasy Prezıdentiniń janyndaǵy Shetel ınvestorlary keńesiniń 29-shy plenarlyq otyrysy ótkizilmek.
Astana ekonomıkalyq forýmy sheńberinde ekonomıkalyq taqyryptar boıynsha negizgi spıkerlerdiń dárister ótkizýi, qatysýshylar úshin Blockchain tehnologııasyn qoldaný boıynsha vorkshoptar serııasy, bıznes-gýrý jáne jetekshi álemdik sarapshylardan netvorkıngter, sheberlik sabaqtaryn ótkizý josparlanýda, sondaı-aq, qazaqstandyq joǵary oqý oryndarynyń stýdentterine arnalǵan birqatar is-sharalar uıymdastyrylady. Al EYDU, BUU, Dúnıejúzilik bank, ADB, EQDB sekildi halyqaralyq uıymdar men qarjy ınstıtýttary forýmnyń seriktesteri bolyp sanalady.
Dınara BITIKOVA,
«Egemen Qazaqstan»