Qazaq ulttyq óner ýnıversıteti Qazaqstan Respýblıkasy Táýelsizdiginiń 25 jyldyǵyna jáne Alash arysy Á.Bókeıhanovtyń 150 jyldyǵyna oraı «Uly dalanyń ulanymyn» atty stýdentter aıtysyn ótkizdi.
«Atalmysh aıtystyń negizgi maqsaty – ot aýyzdy, oraq tildi aqyndardyń júrekjardy jyrymen táýelsizdiktiń qadirin uǵyndyrý jáne azattyq jolynda altyn bastaryn báıgege tikken Alash arystaryn eske alý, atamura ónerdi dáripteý bolyp tabylady. Qazaq ulttyq óner ýnıversıtetiniń qabyrǵasynda tuńǵysh ret ótkizilip otyrǵan aıtysqa ýnıversıtetimizdiń dástúrli mýzykalyq óner fakýltetiniń «Dástúrli án» kafedrasy, Qorqyt Ata atyndaǵy ǵylymı-zertteý ınstıtýty men Aıtys aqyndary men jyrshy, termeshilerdiń halyqaralyq odaǵy qoldaý bildirip, elimizdegi aǵa býyn aqyndar ókilderi óz qaltalarynan qarajat shyǵaryp, júlde taǵaıyndady», dedi aıtysty uıymdastyrýshy, belgili aıtysker aqyn Erkebulan Qaınazarov.
Jastardyń sheberligin kórý úshin shekteý qylmaı, ýaqytty da uzaǵynan berip, olardyń sóz saptaýyna, aıaq alysyna qazylyq jasaǵandardyń qatarynda Qazaqstannyń eńbek sińirgen qaıratkeri Júrsin Erman, jyrshy, QazUО́Ý professory Almas Almatov, Berik Ýálı, Amanjol Áltaı, Serikzat Dúısenǵazy, Dáýletkereı Kápuly, Shyrynbek Qoılybaev boldy.
Aıtys barysynda qazylar jańadan shyqqan aqyndardy jete synaý úshin alǵan upaılaryna qaramaı, qaıta bir aıtystyrdy. Iаǵnı, túgel 10 upaı enshilegen, respýblıkalyq aıtystarda baq synap júrgen aqyndar aqtyq synda óner kórsetken joq, olar úshin respýblıkalyq deńgeıdegi aıtystarǵa esik ashyq. «Bul eksperımenttik jospar óz jemisin berdi deýge bolady. Bizdiń de kútkenimiz osy», dedi aıtysty uıymdastyrýshylar.
Sonymen, bes saǵatqa sozylǵan sóz saıysynyń qorytyndysy boıynsha, bas báıgeni atalmysh oqý ornynyń «Dástúrli mýzykalyq óner» fakýltetiniń 1-kýrs stýdenti Raı Dóńbaı enshiledi. Ekinshi oryndy Arýna Kerimbek, al úshinshi oryn Dáýren Polatbaevqa buıyrdy. Qalǵan aqyndar da qur qol qaıtpady. Olarǵa aıtys ardagerleriniń atyna jazylǵan arnaıy dıplomdar men baǵaly syılyqtar tabys etildi. Tarqata aıtsaq, Amanjol Əltaı taǵaıyndaǵan Shynbolat Dildebaev atyndaǵy júlde Danııar Aldabergenovke, Erkebulan Qaınazar taǵaıyndaǵan Kópbaı Omarov atyndaǵy júlde Nartaı Tileýqulǵa, Dəýletkereı Kəpuly taǵaıyndaǵan Orazaly Dosbosynov atyndaǵy júlde Bek Shmatqa, Jandarbek Begimbetov pen Erik Asqarov atyndaǵy dıplom jəne «SamuryqEKSPO» kompanııasy taǵaıyndaǵan baǵaly elektrondy kitaptar osy joldardyń avtory men Tańjaryq Erjanǵa, Aınur Tursynbaeva taǵaıyndaǵan Təýshen Əbýova atyndaǵy júlde Sulýjan Taýbaldyǵa, Balǵynbek Imashev taǵaıyndaǵan Esenqul Jaqypbekov atyndaǵy júlde Nurqanat Qaıratqa, Jibek Boltanova taǵaıyndaǵan Asylbek Ishanov atyndaǵy júlde Dáýren Ysqaqqa, Shyrynbek Qoılybaev taǵaıyndaǵan Əzimbek Janqulıev atyndaǵy júlde Syrym Ádilbekke, «BaqOrda» medıa-kompanııasy taǵaıyndaǵan Qalıhan Altynbaev atyndaǵy júlde Tórehan Sovetke buıyrdy.
Jalyny bólek jastar búgingi aıaq alysymen aldaǵy alamandarda tól ónerimizdiń tórinen kórinerine bek senimdimiz.
Raýan QAIDAR,
«Egemen Qazaqstan»