Táýelsizdikti tý eter tuǵyrly sharalar

Álemdegi damyǵan otyz mem­lekettiń qataryna enýge qadam basyp otyrǵan qazaq elinde halqymyzdyń qadirin arttyryp, qasıetin ashatyn aıtýly merekeler barshylyq. Alaıda, Qazaqstan qol jetken barlyq ıgiliktiń qaınar kózi bolyp tabylatyn Táýelsizdiktiń 25 jyldyǵynyń orny bólek, áseri aıryqsha ekeni sózsiz. Bul merekeni ózimiz maqtana júretindeı, ózgeler ónege tutatyndaı deńgeıde ótki­zý eldigimizdi kórsetedi, órke­nıet­tiligimizdi ańǵartady. Ústi­mizdegi jylǵa naýryz aıynyń sońynda Memleket basshysynyń Jarlyǵymen Qazaqstan Táýel­sizdiginiń 25 jyl­dyǵyn atap ótýge qatysty. «Birlik pen jasam­pazdyqtyń 25 jyly» Tujyrymdamasy bekitilýi de son­dyqtan. Tujyrymdamaǵa sáıkes, Táýelsizdikti atap ótý erkindik, bir­lik, turaqtylyq, jasampazdyq sekildi qundylyqtarǵa negizdeledi. Ár aıda Táýelsizdik jetistikteri jáne «Máńgilik El» qundylyqtary aıa­synda merekelik sharalar uıym­dastyrylady. Bıyl Táýelsizdiktiń 25 jyl­dyǵyna oraı óńirde 5 myńnan astam shara ótkiziledi dep kútilýde. Bul týraly oblys ákiminiń orynbasary Asqar Sherııazdanovtyń tóraǵalyq etýimen ótken el Táýelsizdiginiń 25 jyldyǵyna oraı sharalar ótkizý jónindegi komıssııanyń otyrysynda aıtyldy. Otyrysqa aýdandar men qala ákimderiniń orynbasarlary, uıymdastyrý komıssııasynyń músheleri, ishki saıasat, mádenıet jáne bilim bólimderiniń, Ǵazıza Jubanova atyndaǵy oblystyq fılarmonııanyń, T.Ahtanov atyn­daǵy oblystyq drama teatrdyń, Dostyq úıiniń basshylary, qoǵam­dyq uıymdardyń ókilderi qatysty. Basqosý barysynda mem­­le­ket­tik organdar men Táýelsizdiktiń 25 jyldyǵyna oraı­las­ty­ryl­ǵan sharalardy daıyndaý jónin­degi qaýymdastyqtyń ju­mysyn úılestirý máseleleri tal­qy­lan­dy. Oblystyq ishki saıa­sat bas­qarmasynyń basshysy Er­bol Nurǵalıevtiń aıtýynsha, Táýel­sizdiktiń 25 jyldyǵyn toılaý barysynda turǵyndardyń áleýmettik máselelerin jaqsartýǵa basymdyq beriledi. – 2016 jyl – Qazaqstan úshin erekshe jyl. Qazaqstan úshin ma­ńyzdy sanalatyn kúnge oraı­las­tyrylǵan merekelik sharalar bizdiń oblysta jyl basynda bastalyp ketti. Osy ýaqyt aralyǵynda kóptegen shara, onyń ishinde respýb­lıkalyq deńgeıdegi sharalar da uıymdastyryldy. Oblys boıynsha Táýelsizdikke arnalǵan 5 myńnan astam áleýmettik mańyzy bar, mádenı, sporttyq, qaıyrymdylyq sharalary uıym­dastyrylady. Sonymen birge, óńirde 200-ge tarta áleýmettik ny­san qoldanysqa beriledi, – dep atap ótken Erbol Nurǵalıev otyrysqa jınalǵandardyń nazaryna Táýelsizdiktiń 25 jyl­dyǵyna qatysty memlekettik komıssııa bekitken logotıpti tanystyrdy. Satybaldy SÁÝIRBAI,  «Egemen Qazaqstan» Aqtóbe oblysy