«Nurmash» dep atalatyn qazaqstandyq startap jobasynyń mobıldik qosymshasy iske qosyldy. Bul týraly keshe Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda aıtyldy.
«Nurmash» elimizdegi «Bolashaq» baǵdarlamasynyń túlekteri oılap tapqan qazaqstandyq joba. Munyń negizinde tyń ıdeıanyń jatqanyn erekshe atap ótken jón, deıdi joba avtorlary. Olardyń aıtýynsha, bul – yńǵaıly ári paıdalanýǵa jeńil túrde oılastyrylǵan mobıldi qosymsha formatyndaǵy mýltımedııalyq onlaın-qyzmet. Sondaı-aq, joba avtorlary IT joba arqyly satýshy men tutynýshy arasynda ózara tıimdi baılanys ornatýǵa bolatynyn jetkizdi. Satýshy óz taýaryna jarnama jasaıdy. Tutynýshy bolsa, sol jarnamadan paıda kóre alady. Kompanııalar jeke kabınetterine kirip, promoaksııalar oınatady, qatysýshylar smartfondary arqyly atalǵan promoaksııalarǵa qatysyp, qomaqty aqshalaı syılyqtarǵa ıe bolady. Al jyl sońynda promoaksııalardyń búkil qatysýshysynyń arasynda iri djek-pot oınatylady. Ol úshin qosymshany júktep, facebook.com, vk.com, plus.google.com nemese Instagram arqyly tirkelý kerek. Sosyn jeke kompanııalar usynǵan promoaksııalardyń bireýin tańdap, qatysý qajet. Qatysý sharttary – qysqa vıdeony qarap shyǵý, foto jasaý, fotomen áleýmettik jelilerde bólisý nemese bir suraqqa jaýap berý. Mine, atalǵan sharttardy oryndap shyqqan adam lotereıaǵa qatysady. Onyń syıaqy qory az emes. Lotereıanyń qorytyndysy boıynsha 40-tan astam adam qyrýar qarjyny uta alady. Osylaısha, satýshy óz taýaryna arzan ári kreatıvti jarnama jasasa, tutynýshy aqy qajet etpeıtin sharttardy oryndap, aqshalaı syıaqyǵa ıe bola alady. Startap aıasynda búginde 5 ulttyq jáne 3 qalalyq promoaksııa bastalǵan. Promoaksııalar qatarynda álemdik fastfýd jelisiniń aımaqtyq ókildik kompanııasy, bank, iri sýpermarket pen qalalyq saýda oıyn-saýyq ortalyqtary bar.
Joba avtory ári «Nurmash-CIS» JShS bas dırektory Eskendir Qasenovtiń aıtýynsha, bas kezinde olar osy jobany Amerıka sııaqty úlken naryqta iske asyrýdy oılaǵan. «Alaıda onyń avtorlary qazaqstandyq mamandar bolǵannan keıin óz elimizde bastaýdy jón kórdik», dedi E.Qasenov. Qazirgi kúni jobanyń bas bólimshesi AQSh-ta ornalasqan.
«Kásipkerler úshin joba asa paıdaly. Kompanııanyń jeke kabınetinde aýdıtorııanyń qurylymy, geografııasy, jas mólsheri, ónimge qatysty talaptary men tilekteri jáne ózge de aqparat bolady. Barlyq málimet yńǵaıly grafıkalyq syzba túrinde berilgen», dedi uıymdastyrýshylar.
Amerıkada «ómirge kelip», Qazaqstanda júzege asa bastaǵan jobanyń mobıldik qosymshasyna biz de úńilip kórdik. Ideıa avtorlary aıtqandaı-aq, aqparattyń bári bar. Alaıda, bir áttegen-aıy, orys, aǵylshyn tilderine tańdaý bolǵanymen, qazaq tili joq. Bul qazaqstandyq jigitter oılap tapqan joba dep qansha maqtanǵanymyzben, jobanyń qazaqsha sóıleýge qaýqary kelmeı turǵany kóńil qulazytady eken. Tym bolmasa, elimizde úshtildilik saıasatynyń qolǵa alynǵanyn eskergen jón bolar ma edi.
Ideıa avtorlary qazir Qazaqstanda bastalǵan joba bolashaqta álemge tanymal bolady degen senimde. Oǵan múmkindigimiz mol, árıne. Sebebi, sońǵy kezdegi qazaqstandyq IT jobalardyń jaıy kósh ilgeri túzelip, aqparattyq-tehnologııalardyń barynsha kúsheıip kele jatqany súısinýge turarlyq. Alaıda, átteń, qazaqstandyq jobalardyń kópshiliginiń qazaqsha sóılemeıtini qynjyltady.
Dınara BITIKOVA,
«Egemen Qazaqstan»