Qazirgi tańda jergilikti ákimniń quzyreti edáýir keńeıtilgen. Endi ákim jergilikti polısııa qyzmeti aldyna qoǵamdyq tártipti saqtaýdy qamtamasyz etý boıynsha mindetter qoıýǵa jáne olardyń oryndalýyn talap etýge quqyly. Bul jóninde keshe Ortalyq kommýnıkasııalar qyzmetinde ótken brıfıngte Ishki ister mınıstrligi Ákimshilik polısııa komıtetiniń tóraǵasy Igor Lepeha atap ótti.
Negizinen «100 naqty qadam» – Ult Josparynyń 30-shy qadamyn iske asyrýdaǵy basty maqsat – jergilikti atqarýshy organdar men jergilikti qaýymdastyqqa esep beretin jergilikti polısııa qyzmetin qurý. Al jergilikti polısııa quqyq buzýshylyqtyń aldyn alý, qoǵamdyq tártipti qorǵaý, jol qozǵalysy qaýipsizdigin qamtamasyz etý, qylmystyń oryn almaýyn eskertý jáne jolyn kesý, ákimshilik quqyq buzýshylyq isterin jáne qylmystyq teris qylyqtar boıynsha hattamalyq nysanda sotqa deıingi tergeý júrgizýmen aınalysatyn bolady. «Jergilikti polısııa qyzmetiniń quramyna ýchaskelik ınspektorlar, ıývenaldyq, jol-patrýldik, tabıǵatty qorǵaý, áıelderdi zorlyq-zombylyqtan qorǵaý bólinisteri (25 myńnan astam birlik) biriktirilip otyr», dedi Igor Lepeha.
Komıtet tóraǵasy bul rette Ákimshilik polısııa komıtetiniń qurylymy ózgertilip, Jergilikti polısııa qyzmetin úılestirý basqarmasy qurylǵandyǵyna nazar aýdarady. Endi onyń quramynda jergilikti atqarýshy organdarymen ózara is-qımyl jasasý jónindegi jańa bólim qurylatyn bolady. Oraıy kelgende aıta ketý kerek, oblys ákimderine jergilikti polısııa qyzmeti basshylaryn laýazymǵa taǵaıyndaý jáne odan bosatý quqyǵy berilgen. Sondaı-aq, jergilikti polısııa qyzmetin baǵalaý halyq pikirine negizdeletindikten, JPQ basshysy jylyna keminde eki ret ákimdikter men máslıhattar aldynda, al bir ret halyq aldynda esep beretini belgili bolyp otyr. JPQ jumysyn uıymdastyrýdaǵy osyndaı qadam jergilikti atqarýshy organdarmen tyǵyz baılanysta jumys isteýge múmkindik beredi jáne osy qyzmet úshin eki jaqtan baqylaýdy qamtamasyz etedi dep kútilýde.
I.Lepehanyń keltirgen málimetterine qaraǵanda, oqıǵa izimen jol-patrýldik polısııa jasaqtarynyń qylmysty ashýy 28,5 paıyzǵa (5950-den 7648-ge deıin) artyp otyr. Jáne ýchaskelik ınspektorlardyń (7654-ten 9492-ge deıin) qylmystardy ashý sany úsh esege ósken. Budan basqa, anyqtalǵan ákimshilik quqyq buzýshylyqtardyń sany 30 myńǵa artyp otyr. Memlekettik til jáne aqparat departamentiniń dırektory Almas Sadýbaev reti kelgende turǵyndardyń óz ýchaskelik polısııa ınspektorlary týraly habardar bolýyn arttyrý úshin mınıstrliktiń vedomstvolyq veb-portalynda arnaıy bet qurylǵandyǵymen bólisti. Tarqatyp aıtqanda, turǵyndar óz ýchaskelik ınspektorlary, olardyń derbes derekteri jáne jumys rejimi týraly málimetterdi taba alady. Sondaı-aq, jergilikti atqarýshy organdardyń rólin arttyrý úshin mınıstrlik oblystyq deńgeıdegi JPQ basshylyq laýazymyna kadrlar rezerviniń kandıdattaryn irikteýde óńirler ákimderimen aldyn ala kelispek. Iаǵnı, IID kadrlar komıssııasynyń quramyna óńirlik ákimdikter ókilderi kiretin bolady. Osylaısha jergilikti polısııa men ákimder arasynda ózara yqpaldasýdyń ońtaıly úlgisi jasalmaqshy.
Sonymen qatar, Ákimshilik polısııa komıtetiniń tóraǵasy qazirgi kezde jergilikti atqarý organdary jergilikti polısııa qyzmetine 9 myń birlik beıne-tirkegishter satyp alǵandyǵyn jetkizdi. Taǵy qosymsha 7,6 myń birlik qajet kórinedi. Jáne de jyl sońyna deıin 2,5 myń alyp júretin jáne 140 mobıldi beınetirkegishterdi satyp alý josparlanypty. Jyl basynan beınetirkegishter kómegimen 17 myńnan astam quqyq buzýshy jaýapkershilikke tartylǵan. Onyń ishinde 100-den astamy qylmystyq sanatqa jatady eken.
Asqar TURAPBAIULY,
«Egemen Qazaqstan»