«30-jyldardaǵy Qazaqstandaǵy asharshylyq qurbandary» Respýblıkalyq derekter bazasynyń jáne www.asharshylyq.kz saıtynyń tusaýkeseri ótti.
Qazaqstan Respýblıkasy Prezıdentiniń arhıvi elimizdegi Ulttyq muraǵat qorynyń qujattaryn dáripteý jumystaryn belsendi atqarýda. Búginde osy maqsatqa qol jetkizý úshin zamanaýı ádister men sheshimder paıdalanylýda, olardyń ishinde eń tıimdisi – muraǵat qujattaryn ǵalamtor arqyly nasıhattaý.
Qazaqstan Respýblıkasy Prezıdenti Arhıviniń www.archive.president.kz domenimen tirkelgen jeke resmı saıty bar. Bul saıt óte tanymal. Jyl saıyn saıtqa 500 myńnan astam adam kiredi. Muraǵattyń óte iri jobalaryn kópshilikke qoljetimdi etýdiń arqasynda osyndaı úlken kórsetkishke ıe bolyp otyrmyz.
2015 jyldyń mamyr aıynda biz «Ekinshi dúnıejúzilik soǵys kezindegi qazaqstandyq áskerı tutqyndar» respýblıkalyq bazalar derekterimen www.tutkyn.kz saıtyn ashtyq. Derekter bazasyn toltyrýǵa barlyq aımaqtyq muraǵattar, vedomstvolyq muraǵattar (QR IIM jáne QR QM), sheteldik muraǵattar, Qazaqstannyń Germanııadaǵy elshiligi jáne zertteýshiler qatysty. Atalǵan saıt iske qosylǵan bir jyldyń ishinde biz 34 myń qazaqstandyq áskerı tutqyndardyń aty-jónin jınap, bir júıege engizdik. Joba kópshilik pen buqaralyq aqparat quraldary arasynda úlken rezonans týǵyzdy. Sodan beri «Keri baılanys» aıdary arqyly biz qazaqstandyqtardan kóptegen hattar alyp turamyz.
Búginde biz osyndaı jobalardy iske asyrý boıynsha úlken tájirıbege ıemiz dep senimdi túrde aıta alamyz.
Arhıvtiń 2016 jylǵy josparynda «Keńestik Qazaqstannyń nomenklatýralyq kadrlary» atty elektrondy anyqtamasynyń birinshi bólimin ashý tur, onyń ishinde 1919-1936 jyldardaǵy elimizdegi nomenklatýralyq qyzmetkerlerdiń 2700 adamnan turatyn ómirbaıandyq anyqtamasy bolady.
Búginde «30-jyldardaǵy Qazaqstandaǵy asharshylyq» jobasynyń aıasynda Qazaqstan Respýblıkasy Prezıdentiniń arhıvi sáıkes derekter bazasy bar www.asharshylyq.kz jańa saıtyn iske qosty.
Bul bazanyń basty maqsaty qazaq halqynyń tarıhı murasyn jańartý bolyp tabylady. Baza kópshilikke arnalyp jasalǵan, sol sebepti ony toltyrýǵa asharshylyq jyldary Qazaqstan aýmaǵynda náýbetke ushyraǵan adamdar týraly qandaı da bir málimeti bar kámelet jasyna tolǵan kez kelgen azamat qatysa alady.
www.asharshylyq.kz saıtynyń «Asharshylyq qurbandary» derekter bazasynda aqparatty bazalar derektemesine málimetterdi engizý úshin saıtta kórsetilgen nysan boıynsha toltyrýǵa bolady.
Bazada jeke basy, onyń ulty, qaı rýdan shyqqany, týǵan kúni men qaıtys bolǵan kúni, týǵan jeri, asharshylyq saldary jáne onyń aýyrlyq deńgeıi jazylady. Eger asharshylyq saldarynan qonys aýdarsa, onda bazada kóship júrgen jyldary men jerleri qosymsha kórsetiledi. Sonymen birge, bazada berilgen aqparat kózi kórsetiledi.
Aqparat kózi retinde jeke tulǵalardan basqa memlekettik muraǵattar, vedomstvolyq muraǵattar, sonymen qatar kitaptar men jınaqtar da bola alady.
Búgingi kúni baza sol náýbet jyldaryndaǵy jappaı asharshylyq qurbandarynyń jaqyndary men týystaryn tolǵandyrǵan oqıǵalar týraly otbasylyq tarıh negizinde muraǵat qyzmetkerlerimen toltyrylǵan málimetterge ıe.
Jasalyp otyrǵan derekter bazasy – 30-jyldardaǵy asharshylyq qurbandaryna degen qurmet.
Saıtty toltyrýǵa qatysqan árqaısymyz ulttyq estelikterimizdi jańartý boıynsha ortaq iske óz úlesimizdi qosamyz. Derekterdiń biregeı banki Qazaqstannyń jańa tarıhynyń tragedııalyq betterin ashý kezinde mamandardyń keleshektegi zertteýlerine myqty derektemetaný bazasy bolary sózsiz. Sol sebepti biz kópshilikti, muraǵattyq mekemelerdi, zertteý ortalyqtaryn, sonymen birge tarıhshylar men elimizdiń ǵylymdaryn osy jalpy jumysqa qatysýǵa shaqyramyz.
Bahythan ShAILAZYMOV,
Qazaqstan Respýblıkasy Prezıdenti arhıviniń
muraǵattyq tehnologııalar basqarmasynyń basshysy
ASTANA