M.Tynyshbaev atyndaǵy Qazaq kólik jáne kommýnıkasııalar akademııasynda Uly Jeńistiń 71 jyldyǵy qarsańynda qos batyr qyzymyzǵa arnalǵan ashyq kafedra kúni ótti.
Elimizdiń kólik-kommýnıkasııalyq keshenine, onyń ishinde temirjol men avtojol kólikteri, sondaı-aq, telekommýnıkasııalar salalary boıynsha joǵary bilikti mamandar daıarlaıtyn birden-bir jetekshi joǵary oqý orny bolyp tabylatyn atalmysh akademııa bıyl óziniń 85 jyldyq mereıtoıyn atap ótýge daıyndyq ústinde.
Mereıtoı qarsańynda «Ýaqyt – tarıhtyń kózi, nury!» degen taqyrypta baıqaý jarııalanyp, ol is-sharalar aldyn ala jasalǵan keste boıynsha ótkizilýde. Osyndaı kafedra kúnin jýyrda «Avtomobılder, jol tehnıkasy jáne standarttaý» kafedrasynyń professorlyq-oqytýshylar quramy №3 Stýdentter úıinde «Batyr apalar erligine – myń taǵzym!» degen taqyrypta ótkizdi. Taqyryptyń ózi aıtyp turǵandaı, áńgime-suhbat Uly Jeńistiń 71 jyldyǵyna arnaldy. Is-shara stýdentter úıiniń birneshe bólmelerin aralap, stýdentterdiń ómir-tirshiligimen tanysýdan bastaldy. Taǵy bir aıta ketetin jaıt, akademııa Stýdentterdiń jataqhana tapshylyǵyn sezinbeıtin joǵary oqý oryndarynyń birinen sanalady. Al jataqhananyń Stýdentter úıi dep atanýy – ondaǵy ár bólme úlken jáne kishi seksııadan páter úlgisinde salynǵan.
Sonan soń kafedra kúni lyq tolǵan oqý zalynda jalǵasty. Áńgime-suhbatty kafedra meńgerýshisi M.S.Kýlgıldınov ashyp, stýdentterdi akademııanyń kele jatqan mereıtoıymen quttyqtap, oqý úderisinde alda bolýǵa shaqyrdy. Al negizgi baıandamashy kafedra dosenti, qazaqtyń batyr qyzdary Álııa men Mánshúktiń ónegeli erlik ómirin zertteýshi, qos apasy jerlengen Pskov oblysynda tórt ret bolyp, rýhtaryna taǵzym etip qaıtqan, 2015 jyldyń úzdik oqytýshysy Keńes Júsipov boldy.
Ol qazaqtyń batyr qyzdary Álııa men Mánshúktiń erlikke toly jarqyn ómiri, Otan soǵysyndaǵy kórsetken erligi, týǵan elge degen zor mahabbaty – halqymyzǵa, barlyq urpaqqa úlgi-ónege bolatyny jaıly áserli áńgime shertti. О́ziniń akademııa stýdentterimen birge qazaqtyń qos batyr qyzdary jerlengen Reseıdiń Pskov oblysyndaǵy Novosokolnıkı jáne Nevel qalalaryna jasaǵan saparlary jaıynda, ıaǵnı apalarymyzdyń beıitterine gúl shoqtaryn qoıyp, rýhtaryna quran baǵyshtap, taǵzym etip qaıtqandary jaıly slaıdtar arqyly tartymdy da qyzyqty aıtyp berdi. Al saparǵa qatysqan stýdentterdiń úsheýi de qazirgi tańda akademııada alǵan mamandyqtary boıynsha Qazaqstan temirjolynyń Astana, Aqtóbe jáne Qyzylorda bólimshelerinde qyzmet atqaryp júrgenderi jaıly habarlap ótti.
Bıyl tamyz aıynda Novosokolnıkı qalasy men Álııa apamyz shaıqasta erlikpen qaza bolǵan Nasva stansasyna 115 jyl tolatyndyǵy, osy mereıtoıǵa reseılik dostar akademııadan qonaqtar shaqyryp jatqandyǵy, osy saparǵa daıyndyqtyń bastalyp ketkendigi, barýǵa nıet bildirgen stýdentterge jol ashyq ekendigi jaıly da aıtyldy.
– Qazaqtyń qaharman qyzdary Álııa men Mánshúk Reseı jeriniń sonaý alys túkpirinde ultymyzdyń mereıin ústem etip, qaısar qazaqtyń rýhy men asqaq erligin álemge tanytyp, máńgi uıqyda jatyr, – dedi jıyn sońynda sapar jetekshisi, dosent Keńes Júsipov. – Olardyń erlikke toly qysqa ǵumyry jaıly zertteýshiler jazyp bitti, kózkórgender, ókinishke oraı, búginde joq. Endigi másele – batyr apalarymyzdyń beıiti sonda jatqandyqtan sol jerdegi jergilikti halyqpen dostyq qatynasty úzip almaı, jastar jaǵy jıi-jıi atbasyn buryp, únemi tyǵyz baılanysta bolǵanymyz durys shyǵar. Sonyń bir aıǵaǵy retinde osy búgin áńgime bolǵan sapardy aıtýǵa bolady.
Otanǵa degen súıispenshilik, patrıot degen uǵymdardyń bos sóz emes ekendigine óskeleń urpaq taǵy da bir kóz jetkizdi. Oǵan úlgi – qos batyr apamyzdyń erlikteri!
Gúlzeınep SÁDIRQYZY,
«Egemen Qazaqstan»
ALMATY