El ekrandarynda Elbasy týraly fılm kórsetiledi
Keshe Prezıdent janyndaǵy Ortalyq kommýnıkasııalar qyzmetinde «Juldyzdar toǵysqanda» fılmi boıynsha túsirilim tobynyń qatysýymen baspasóz konferensııasy bolyp ótti. Fılm Mádenıet jáne sport mınıstrliginiń tapsyrysymen Qazaqstan Táýelsizdiginiń 25 jyldyǵyna oraı túsirilgen.
Kınotýyndy álem tarıhyndaǵy eń qıyn kezeń – Keńes Odaǵynyń qulaýy, jańa táýelsiz memleketterdiń paıda bolýy, onyń ishinde Qazaqstan Respýblıkasy týraly baıandaıdy. Fılm 1984-1991 jyldar aralyǵyn qamtıdy. Atalmysh kórkem fılm el tarıhyndaǵy eleýli oqıǵalarǵa zer salyp, Qazaqstan Respýblıkasynyń Tuńǵysh Prezıdenti – Elbasynyń qoǵam ómiriniń bar salasynda atqarǵan rólin, sondaı-aq, Memleket basshysynyń dúnıejúzilik aýqymda yntymaqtastyqty arttyrýdaǵy aıryqsha qyzmetin saralaıdy.
– «Elbasy joly» kınotýyndysynyń tabysty bolýynyń basty sebebiniń biri – onyń Prezıdent N.Á.Nazarbaevtyń shynaıy ómirbaıanynyń negizinde túsirilýi. «Elbasy joly» týyndysy qaı kezeńde de ózektiligin joımaq emes, óıtkeni, bul shyǵarmada Nursultan Ábishulynyń jeke úlgisinde aldyna qoıǵan maqsattaryna jete bilgen jáne shyn máninde, eńbek adamynyń azamattyq qyzmet joly kórsetilgen», – dep atap ótti mınıstr A. Muhamedıuly.
Onyń sózinshe, fılm túsirilimine Qazaqstan men Reseıdiń eń myqty kınematografısteriniń shyǵarmashylyq toby tartyldy. Túsirilim Qazaqstan jáne Reseı aýmaǵynda tórt aı boıy júrgizildi.
Fılm rejıssery jáne ssenarııiniń avtory – Reseı halyq ártisi, Reseı Federasııasy Memlekettik syılyǵynyń laýreaty – Sergeı Olegovıch Snejkın. «Juldyzdar toǵysqanda» kórkem fılmi álemdik tarıhtaǵy eń kúrdeli ýaqyt – Keńes Odaǵynyń ydyraýy jáne Táýelsiz Qazaqstannyń paıda bolýyn kórsetedi. Kınotýyndy el tarıhyndaǵy eń jarqyn oqıǵalarǵa saraptama usynyp, Qazaqstan Respýblıkasy Tuńǵysh Prezıdentiniń memlekettik qurylymnyń túrli salalaryn reformalaýdaǵy rólin baıandaıdy.
Basty róldi qazaqstandyq tanymal akter Berik Aıtjanov somdady. Sondaı-aq, fılmge Altynaı Nógerbek, Aldabek Shalbaev, Azamat Satybaldy, Ǵanı Quljanov, Erkebulan Daıyrov, Janel Maqajanova, Dınara Baqtybaeva, Qarlyǵash Muhamedjanova jáne basqalar tústi. Basqa da keıipkerlerdiń beınesin Igor Ýgolnıkov, Sergeı Garmash, Darıa Moroz, Alekseı Gýskov, Hıý Freızer, Rıchard Korderı, Stıven Peısı sııaqty reseılik jáne sheteldik akterler somdady.
«Juldyzdar toǵysqanda» fılmi 2016 jyldyń 28 sáýirinen bastap jalpyulttyq prokatqa shyǵady, elimizdiń barlyq kınoteatrlarynda kórsetiletin bolady.
Raýshan TÁÝIRHANQYZY,
«Egemen Qazaqstan»