Urlyqty jetispeýshilikten jasaıdy deıtinbiz. Sóıtsek, qolǵa ilingenniń bárin úptemeı, tek asyl tastardy alýmen aınalysatyndar, ıaǵnı tańdap tonaıtyndar da bar eken.
Mańǵystaý oblysynda tek altyn buıymdardy urlaýmen aınalysqan urylar ustaldy. Olardy bázbireýler «kezbe urylar» dep atap úlgerdi. Sebebi, Mańǵystaýǵa Qyzylorda oblysy óńirinen kelgen urylar el-jerdi kezip júrip, «kásip jasaıtyn» bolyp shyqty. Olar Mańǵystaýda Fort-Shevchenko, Jańaózen, Jetibaı, Quryq, Shetpe kentterinen 27 úıdiń múlkin qoldy etken. Aldymen, aýyl-aýyldy aralap, aýqatty, dáýletti degen úılerdiń esigin qaǵyp kóredi eken. Úıde adam joq ekendigine kóz jetkizgen soń, terezeden kirip, aqsha men altyn buıymdardy alyp kete beretin bolǵan. Kóbine jeke úılerdi tonaýmen aınalysyp kelgen úsh baýkespe «oljalaryn» Aqtaý qalasyndaǵy ortalyq bazarda ótkizip kelgen. Alaıda, áli ótkizip úlgermegenderin polısııa tárkiledi. Baýkespeler jarty aıdyń ishinde 15 mıllıon teńgeniń dúnıesin qoldy etken. Olardy tintý barysynda 2 mıllıon teńge men birshama Kanada dollary tabyldy. Áýelde, qutylǵandarymen, artynan tutyldy. Qazir urylar tergeý abaqtysynda.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy