Teatrdyń qurylymdyq jáne onyń shyǵarmashylyq erekshelikterine qatysty másele jeke qaralady. Májilistiń Áleýmettik-mádenı damý komıtetinde qurylǵan jumys tobynyń músheleri osyndaı sheshimge keldi.
Aıta ketý kerek, jumys tobynyń otyrysynda «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» zań jobasy talqyǵa salyndy. Atalǵan zań jobasy boıynsha «Mádenıet týraly» qoldanystaǵy zańnyń «Teatrlar» dep atalatyn 22-babyna ózgerister engizý kózdelgen bolatyn.
Depýtattar zań jobasy boıynsha ázirlengen salystyrma kestedegi Saýytbek Abdrahmanov, Maıra Aısına, Gúlmıra Isimbaeva, Bekbolat Tileýhan, Fahrıddın Qarataev usynǵan túzetýlerdi qarady. Bekbolat Tileýhan jetekshilik etken jumys tobynyń otyrysynda Nurtaı Sabılıanov, Nurlan Dýlatbekov, Káribaı Musyrman, Maıra Aısına jáne basqa da depýtattar óz pikirlerin bildirdi.
Otyrysta memlekettik tapsyryspen shyǵarylatyn kitaptardy elimizdegi kitaphanalarǵa tabys etý máselesi de talqyǵa salyndy. Jumys tobynyń músheleri bul másele áli de zertteı túsýdi qajet etedi degen toqtamǵa keldi.
Sondaı-aq, «Qazaqstan Teatr qaıratkerleri odaǵy» RQB tóraǵasy Tuńǵyshbaı Jamanqulov Qazaqstan Jazýshylar, Kompozıtorlar, Sýretshiler sııaqty shyǵarmashylyq odaqtardy úkimettik emes uıymdardyń qataryna qospaý kerektigin aıtty. Depýtattar teatrlardyń búgingi ózekti máselelerin eskere kelip, qoldanystaǵy zańǵa jańa túzetýler engizedi degen senimin jetkizdi.
Jumys tobynyń kelesi otyrysynda teatrǵa qatysty másele taǵy da talqyǵa sanylatyn boldy.
«Egemen-aqparat»