QOSTANAI. 1 mamyr. Qostanaı qalasynda bıyl 14-shi ret ótken halyqaralyq «Altyn mıkrofon» balalar án baıqaýy márege jetti. Oǵan balalar Qazaqstannyń kóptegen oblystarynan, Lıtvadan, О́zbekstannan, Reseıden qatysty. Báıgeniń bas júldesi Lıtvaǵa ketti. Bul týraly kstnews.kz saıtyna silteme jasaǵan egemen.kz tilshisi habarlady.
Úsh kún boıy 74 jas talant halyqaralyq án baıqaýynyń bas júldesi úshin básekege tústi. Jas boıynsha úsh kategorııaǵa bólingen jas daryndardyń eń kishkentaıy 4 jasta boldy. Búldirshin ánshilerdiń barlyǵy da kórermenin tańqaldyrdy, ánmen sýsyndatty deýge bolady. Bıyl qazylar alqasy balalardyń ánimen qatar olardyń sahna kıimine, oryndaǵan shyǵarmasyna oraı jasaǵan obrazyna da kóńil bóldi.
Baıqaý qorytyndysy boıynsha, úshinshi oryndy qostanaılyq jas ánshiler Sofııa Kım, Kamılla Kamargına, almatylyq Arýjan Toqtaǵan men Raýshan Qalbaevlar aldy. Ekinshi oryn qostanaılyqtar Dıas Toqyshev, Nuraı Kúderbekova, Madına Dakısheva jáne Sankt-Peterbýrgten kelgen Ekaterına Gılman ıelendi. Birinshi oryn Oral qalasynan kelgen Marat Dýman men Lısakov qalasynan qatysqan Gaýhar Rýstemqyzyna jáne Belorýsten kelgen Valerııa Azarenkoǵa buıyrdy. Baıqaýdyń gran-prı júldesin belgili kompozıtor Keńes Dúısekeev bastaǵan qazylar alqasy Lıtvadan kelgen Karolına Lındoǵa laıyq dep tapty.
Baıqaýda kórermenderdi de, qazylar alqasyn da tańdaı qaqtyrǵandar az bolmady. Qostanaı oblysynyń Lısakov qalasynan kelgen Gaýhar Rústemqyzy fransýz tilinde Je suis malade ánin oryndaǵanda búkil zal turyp ketti jáne jas talant sahnaǵa qaıta shyǵyp, taǵzym etti. Búkil dúnıejúzilik festıvalder men artıster uıymynyń múshesi Sergeı Savenkov talantty qyzdy Sankt-Petrbýrgte ótetin «Pýt k zvezdam» án baıqaýyna shaqyrdy jáne jol shyǵynynyń barlyǵyn ózderi óteıtinin de aıtty.
Názıra Járimbetova.
Derek, foto: kstnews.kz.