О́skemende óńir baıkerleri Qazaqstan halqynyń birligi kúnine arnalǵan erekshe shoý uıymdastyrdy. О́skemen, Semeı jáne Rıdder qalalarynyń baıkerleri atalǵan sharany jańa maýsymnyń ashylýyna arnap otyr. Sharaǵa qatysýshylar oblys ortalyǵynyń turǵyndaryna motoshoý arqyly qaıtalanbas sheberlik ádisterin kórsetti.
О́ńir ortalyǵynyń ortalyq kóshelerimen júrip ótken 80-ge jýyq shyǵysqazaqstandyq baıkerler kolonnasy merekelik sherýin Komsomoldar aralynda aıaqtady. Baıkerler otyrǵan motosıklder arasynan aty ańyzǵa aınalǵan «Harley-Davidson» markasynan bastap kóne «Ýralǵa» deıingi túrli baık tulparlaryn kórýge bolady. Shoý aıasynda qyzyqty baıqaýlar ótip, oǵan kórermender de qatysty. Olardyń arasynda, baık-mádenıetke qyzyǵýshylyq tanytqan qyzdar da bar. Uıymdastyrýshylardyń aıtýynsha, jańa maýsymdy ashý – baıkerler úshin ǵana emes, motosıkldi unatatyn barlyq áýesqoılar úshin ataýly mereke. Bıyl bul merekeniń birlik kúnimen tuspa-tus kelýi beker emes. Baıkerler qaýymy qazaqstandyqtardyń yntymaǵy men tatýlyǵy berik bolýyn tileıdi.
Kóptegen baıkerler burynnan motoónerge mashyqtanǵan bolsa-daǵy, bul sherýge alǵash ret qatysýshylar da kezdesedi. Jyl ótken saıyn baıkerlerdiń tamasha shoýyna yqylas tanytýshylar qatary artyp keledi. Baık-shoý sońynda baıqaý jeńimpazdary marapattaldy.
Dýman ANASh,
«Egemen Qazaqstan»
О́SKEMEN