Maıdangerler madaqtaldy

Astanada ornalasqan Reseıdiń ǵylym men mádenıet ortalyǵynda Uly Jeńistiń 71 jyldyǵyna baılanysty keshegi kúndeı kúrkirep ótken surapyl soǵysta keýdelerin oqqa tosyp, Otanyn qorǵaǵan maıdangerlerdi madaqtaý rásimi boldy. Saltanatty qabyldaýǵa qatysqan qart sarbazdardy RF Qazaqstandaǵy Tótenshe jáne ókiletti elshisi Mıhaıl Bochar­nıkov aldaǵy aıtýly merekemen quttyqtap, adamzatty fashızm aranynan aman alyp qalǵan­dary úshin olarǵa alǵys sezimin bildirdi. Tarıh qaıtalaýdy súıe­tindikten, taǵy aıta keteıik, ekin­shi dúnıejúzilik qyrǵynda bir mıl­lıonnan astam qazaqstandyq jaýyngerler qoldaryna qarý ustap, qaısarlyq pen qaharmandyqtyń qaıtalanbas úlgilerin kórsetti. Esil bozdaqtardyń teń jarymy qaza taýyp, súıekteri urys dalasynda qaldy. Qazaqstanda jasaqtalǵan áske­­rı quramalardyń qataryn­da Aqmola qalasynda uıym­das­ty­rylǵan 310-shy, 387-shi, 29-shy atqyshtar jáne 106-shy kavalerııalyq dıvızııalar ba­qaı­shaǵyna deıin qarýlanǵan bas­qynshylarmen erlikpen shaıqasqany belgili. Astana qalalyq ardagerler keńesi tóraǵasynyń orynbasary Anatolıı Golýbchıkovtyń aıtýynsha, qazir elordada eliniń azattyǵy úshin etigimen qan keshken 170 qarııa turady. Solardyń sapyndaǵy Qa­dan Bekenov, Ahat Bekmádı, Ma­rııa Poltoraskaıa, Moıseı Gold­berg, Alekseı Frolov, Barlybaı Tábeshov, Oleg Lınnık jáne bas­qalar osy kezdesýge keldi. Taıaq­taryna súıengen tarlanbozdar bir-birimen qaýqyldasyp, keıingi jastarǵa estelikterin aıtyp, kó­ńilderi kóterilip qalǵanyn kórdik. Qurmetti qonaqtarǵa arnalǵan konsertte Qalıbek Qýanyshbaev atyndaǵy qazaq akademııalyq drama teatry kameralyq orkestriniń súıemeldeýimen Qu­daıbergen Ábildın, Azat Tura­nel, Tursyn Tó­re­muratova, Baqyt­jan Sul­ta­nov, Álimjan Baqyt­ja­nov syn­dy ónerpaz órken­der Isaak Dýna­ev­skıı, Nıkıta Bogo­slov­skıı, Iаn Frenkel, Seıdolla Báı­­ter­ekov, Vasılıı Solovev-Sedoı, Davıd Týhmanov sııaqty kór­nekti kompozıtorlardyń kóp­shi­­likke ábden tanymal ánderin oryn­­dap, bárimizdi ádemi áserge bóledi. Kezdesýden keıin áli de qa­tardan qalmaǵan qarýlastar óz­de­riniń qurmetine jaı­ylǵan dastarqannan dám tatty. Talǵat BATYRHAN, «Egemen Qazaqstan» Sýretti túsirgen Orynbaı BALMURAT