28 sáýir kúni «Qazaqstan» ulttyq arnasynda «Shyn júrekten» qaıyrymdylyq telemarafony bastalǵany týraly jazǵan bolatynbyz. Atalǵan shara qaıyrymdylyqqa muqtaj jandar men olarǵa qolushyn sozýǵa erikti adamdar arasyndaǵy altyn kópirge aınaldy desek, artyq aıtqandyq emes. Qaıyrymdylyq pen izgilikti nasıhattap, túrli dertke shaldyqqan jandarǵa kómek qolyn sozýdy kózdegen bul áleýmettik-qaıyrymdylyq telejobasy ulttyq arnadan 3 kún boıy kúndiz-túni toqtaýsyz, tikeleı efırge shyǵyp otyrdy. Telemarafonǵa ulttyq arnanyń aımaqtardaǵy fılıaldary da túgeldeı atsalysyp, kómekke zárý jandardyń armandarynyń oryndalýyna sep boldy.
Esterińizge sala keteıik, «Qazaqstan» telearnasy birneshe jyl qatarynan kún saıyn aınalasyna jaqsylyq jasaıtyn adamdar týraly syr shertetin «Shyn júrekten» atty telejobasyn usynyp keledi. Bizdiń qoǵamda ómirdiń túrli aýyrtpalyǵyn kórip, taǵdyrdyń ártúrli synaǵyna tap bolsa da moıymaıtyn qaısar jandar kóp. Olar ózderi betpe-bet kelgen qıyndyqty jeńip qana qoımaı, sonymen qatar aınalasyndaǵy adamdarǵa da qolynan kelgenshe jaqsylyq jasap, aıryqsha erik-jigerdiń, qaıyrymdylyqtyń úlgisin kórsetip júr. Olardyń qajymas qaıraty, ıgi isteri men ómirlik tájirıbesi tek týǵan-týystaryna, óz ortasyna ǵana emes, búkil el-jurtqa úlgi bola alady.
Eń qıyny, olardyń arasynda áli ómirdiń ystyq-sýyǵyn sezinip úlgermegen búldirshinder men bozbalalar da bar. Búkilhalyqtyq aksııanyń túpki maqsaty da sol, taǵdyrdyń qatal synyna ushyraǵan jandarǵa, onyń ishinde dertine daýa izdegen perishte peıil balalarǵa qolushyn berý.
Atalǵan arna uıymdastyryp jatqan telemarafonda áý basta 4 balaǵa kómek kórsetý josparlanǵan-dy. Biraq, qaıyrymdylyq isi tek munymen shektelip qalmaq emes. Bul oraıda «Qazaqstan» RTRK» AQ qyzmetkerleri de qolyndaǵy baryn aıanyp qalmaı, árkim shamasyna qaraı materıaldyq kómek kórsete bildi. Koksartroz dertine 11 jasar Dıas Jánibekuly nebári eki jarym jasynda shaldyqqan. Sodan beri segiz jyl ýaqyt ótipti. Búginde dárigerler Dıastyń býyndaryn bosatyp, bulshyq etterin shynyqtyrýǵa jumys jasaýda. Ol úı jaǵdaıynda bilim alady. Áleýmettik qyzmetkerler, pedagog jáne psıholog mamandar kelip tárbıe men bilim berý jumystaryn júrgizýde. Jaqsylyqtyń jarshysyna aınalǵan telearnaǵa Dıastyń anasy Dana Jumanova da óz alǵysyn bildirdi.
Shara aıasynda Syr eliniń halyq qalaýlylary kómekke muqtaj jandarǵa qolushyn sozdy. Úsh balanyń anasy Ǵalııa Appaqova jıyrma jyldan beri bala kútimimen úıde otyr. Onyń ekinshi uly Qýanysh sal aýrýyna shaldyqqan. Qalalyq máslıhat depýtattary aldymen osy shańyraqqa kómek kórsetti. Sonymen qosa, bes balanyń anasy 78 jasar Darıha Mahambetovanyń búginde múmkindigi shekteýli qyzymen birge turyp jatqan jaı-kúıin kórip, kómek berdi. Mundaı ıgi bastama turmysy tómen otbasylaryna, múmkindigi shekteýli jandarǵa, kóp balaly analarǵa demeý bolary sózsiz.
Baǵdarlamaǵa kelgen qonaqtar da jaqsylyq jasaýdyń, adam balasynyń bir-birine kómeginiń mańyzdylyǵy týrasynda ǵıbraty mol áńgimeler aıtyp, jurtshylyqty izgilikke úndedi. Qaıyrym jasaý – Alla taǵalanyń razylyǵyna bóleıtin amal. Shara sheńberinde «Qazaqstan» ulttyq arnasynyń meken-jaıyna, túrli áleýmettik jeliler arqyly myńnan astam kómekke zárý jandardan ótinishter kelip túsken. Balalardyń taǵdyryna alańdap, sebep bolǵysy keletin adamdarǵa arnaıy banktik esepshot ta ashyldy.
Telemarafon barysyn qorytyndylaı kele, bas-aıaǵy 3 kúnde Qazaqstan halqy Assambleıasynyń janynan qurylǵan arnaıy qorǵa 50 mıllıon teńgege jýyq qarajat aýdarylyp úlgeripti. Jumyla kótergen júk jeńil. Alaıda, qaıyrymdylyqty qansha jasasań da kóptik etpeıdi. О́ıtkeni, jaqsylyqtyń eshqashan shegi bolmaq emes.
Shara barysynda qanshama adam janyna jubanysh taýyp, qýanyshtan jylap ta aldy. Tipti, mundaı qaıyrymdy óńi túgili túsinde kórmegen keıbir jandar tosyn syıdy ertegige balap, óz kózderine ózderi senbeı tańyrqady. Balalar shattandy. Olardyń áýeli Jaratýshyǵa, sosyn sharany uıymdastyryp jatqan QHA múshelerine, «Qazaqstan» teleradıokorporasııasy» AQ basshylyǵy men qyzmetkerlerine izgiliktiń aınasy bola bilgen Atymtaı jomart azamattarǵa, uıym, mekeme, birlestikterge aýdarǵan qarajattaryna sheksiz rızashylyqtaryn bildirgen alǵystar legi tolastar emes. QHA «О́zbek etnomádenı ortalyǵy» QB tóraǵasynyń orynbasary, jeke kásipker Hasan Sharıpov, QHA nemis qaýymdastyǵynyń «Vozrojdenıe» áleýmettik baǵdarlamalar úılestirýshisi Elena Shvars jáne QHA janyndaǵy Astana qalasy boıynsha «Jarasym jastar» uıymynyń tóraǵasy Azamat Súndetov te sharapaty mol sharany qoldap, shynaıy lebizderi men kómekterin aıap qalmady. Mine, az da bolsa, senimniń aqtalǵany, armandardyń oryndalǵany! Taýqymet tartqan jandardyń taǵdyryna alańdap, kómek kórsete bilý úlken is. Meıirimdi jandar ózderiniń jaqsy isterin aıtýdy unata bermeıdi. «Shyn júrekten» baǵdarlamasynyń maqsaty – osyndaı erekshe erlik, jaqsylyq ıelerin elge tanytý.
Sondyqtan, tek «Shyn júrekten» baǵdarlamasy aıasynda ǵana emes, jalpy, ómirde de bir-birimizge árdaıym jaqsylyq jasap júreıik. Tabıǵattaǵy barlyq jylý – kúnnen, ómirdegi barlyq jylý adamnan ekendigin umytpaıyq. Árbir adamnyń júreginde jylýy bolsa, bir-birine árdaıym jaqsylyq jasap júrse, onda barlyǵymyz qýanysh pen baqytta ómir súrer edik.
О́mirde qaıyrymdy adamdardyń kóp ekenine senińiz...
Raýshan TÁÝIRHANQYZY,
«Egemen Qazaqstan»
Sýretti túsirgen
Erlan OMAROV