El men eldiń, ult pen ulttyń arasyna altyn kópir ornatyp, jat jerlik bolsa da jaqyndastyra túsetin negizgi baılanys kúshi olardyń óneri men mádenıeti bolsa kerek. Osy qaǵıdany berik ustanyp, ultaralyq tatýlyqtyń arta túsýine úles qosyp júrgen Bilim jáne ǵylym mınıstrligi men KATEV qoǵamdyq qory bıyl da «Jarqyn bolashaq» til jáne mádenıet festıvalin óz deńgeıinde ótkizdi.
Buǵan deıingi jarystar respýblıka sheńberinde shektelse, osy jolǵy daryndylar dodasy halyqaralyq dárejege kóterilgen. El Táýelsizdiginiń 25 jyldyǵyna oraı uıymdastyrylǵan sharaǵa álemniń jıyrmaǵa jýyq elinen ónerli órender kelip, óz baqtaryn synady.
«Elbasy Nursultan Nazarbaevtyń «Qazaq tili ǵajap til, tek biz ony nasıhattaı bilýimiz kerek», degen sózin tý etip, jyl saıyn «Jarqyn bolashaq» qazaq tili olımpıadasy ótkizilip keledi. Bul olımpıadany ótkizýdegi basty maqsat – memlekettik tildiń mártebesin kóterý, qazaq jáne ózge ult ókilderiniń qazaq tiline degen qyzyǵýshylyǵyn arttyrý, olarǵa ulttyq qundylyqtarymyzdy, salt-dástúrimizdi, tarıhymyzdy boıyna sińirý arqyly «Máńgilik El» jalpyulttyq ıdeıasyn júzege asyrýǵa úles qosý bolyp tabylady. Bıyl 8-shi ret ótkizilgen «Jarqyn bolashaq» qazaq tili olımpıadasyna dúnıeniń túkpir-túkpirinen 5 myńǵa jýyq daryndy jas qatysyp, 172 oqýshy jeńimpaz atanǵan jáne olardyń 42-sine joǵary oqý oryndarynyń bilim granttary tabystaldy. Osy joly olımpıadaǵa birinshi ret Qyrǵyzstan, О́zbekstan, Mońǵolııa jáne Altaı ólkelerinen kelgen qandastarymyz qatysty. Kindik qany tamǵan jerge kelgen birqatar qazaq balalaryna da joǵary oqý oryndarynyń granttary bólinip, olarǵa atajurtynda bilim alýǵa jaǵdaı jasaldy», – dedi alǵash bolyp sóz alǵan KATEV halyqaralyq qoǵamdyq qorynyń prezıdenti Darhan О́te.
Festıvaldyń bastalý barysynda ár eldiń turmys-tirshiliginen, mádenıetinen málimet beretin kórme uıymdastyrylǵanyn da aıta ketsek deımiz. Júzden júldeger, myńnan myqty shyqqan oqýshylardy marapattaý rásiminde qurmetti qonaqtardyń quramyn Parlament depýtattary Saýytbek Abdrahmanov pen Qýanysh Aıtaqanov, QHA múshesi, professor Ádil Ahmet tolyqtyrdy.
«Bir máseleni astyn syzyp aıtýymyz kerek. KATEV qory uıymdastyratyn «Jarqyn bolashaq» festıvaliniń deńgeıi jyldan jylǵa ósip keledi. Búgingi qulaqtan kirip boıdy alǵan ásem án men bı júrekten júrekke jetetin dúnıeler. Buǵan tárjime kerek emes. Egemendigimizdiń 25 jyldyǵyna arnalǵan festıvalǵa 25 elden kelgen túlekter búkil jer júzine eń keregi birlik pen tatýlyq, dostyq ekenin, soǵyssyz ómir kerek ekenin dáleldedi. Álemniń ár jerinen kelgen jastar erteń óz elderine qaıtqanda bizdiń táýelsiz Qazaqstannan beıbitshiliktiń jarshysy bolyp, dostyqtyń elshisi bolyp attanady. Men búgingi festıvalde oryndalǵan ánder men bıler Birikken Ulttar Uıymynyń bas páterinde kórsetýge laıyqty dúnıe dep sanaımyn», – dep Ádil Ahmetov óz oıyn ortaǵa saldy.
Olımpıadany ótkizýdiń basty maqsaty – Memlekettik tildiń qoldanylý aıasyn keńeıtý bolsa, ekinshi jaǵynan, erekshe daryndy oqýshylardy anyqtaý, qazaq tilinde án aıtý, mánerlep oqý, ǵylymı jumys qorǵaý, shyǵarmashylyq qabiletin kórsetý arqyly Qazaqstannyń «jarqyn bolashaǵy» úshin aıanbaı qyzmet etetin qabiletti jastarǵa qoldaý kórsetý ekenin de esterińizge salamyz. Saıystyń irikteý kezeńinde memlekettik jáne memlekettik emes jalpy bilim beretin mektepterdiń, lıseılerdiń, gımnazııalardyń arasynda elimizdiń barlyq oblystarynan, sondaı-aq, joǵaryda atap ótkenimizdeı, shetelde turatyn qandastarymyzdyń ishinen 7-11 synyp oqýshylary 5 baǵyt boıynsha «Tilshi-ádebıetshiler», «Jas ǵalymdar», «Jazýshylar», «Sóz sheberleri», «Ánshi-bulbuldar» degen atalymdar aıasynda baqtaryn synaǵan bolatyn.
Aıta ketetin taǵy bir jaıt, bul jolǵy jarysqa kelgen Afrıka, Senegal, Koreıa, Reseı sııaqty elderdiń ónerli ókilderine joǵary oqý oryndarynan bólingen granttar berilmeıdi, olardyń kelýdegi negizgi maqsaty Táýelsizdigimizdiń 25 jyldyǵyn ózderiniń óneri arqyly quttyqtaý sezimderin jetkizý bolyp tabylady.
О́z tilin órge shyǵaryp, ózge tildi ógeı kórmeıtin jastardyń bul jolǵy qadamy da qarqyndy. Sharapatty sharanyń jabylý saltanatyndaǵy júrek tebirenter áserli tustary arqyly festıvaldyń joǵary deńgeıde uıymdastyrylǵanyna kóz jetkizýge bolady.
Raýan QAIDAR,
«Egemen Qazaqstan»
ASTANA