TARAZ. 3 mamyr. Taraz memlekettik pedagogıkalyq ınstıtýtynda «Bir halyq – bir el – bir taǵdyr» atty óner festıvali ótti. Atalmysh sharaǵa oqý ornynda bilim alyp jatqan túrli ult ókilderi qatysty. Bul týraly TarMPI Aqparattyq-ımıdjdik qyzmetine silteme jasaǵan egemen.kz tilshisi habarlady.
Festıvaldyń maqsaty – ana tilindegi erkin shyǵarmashylyqqa jaǵdaı jasaý, jastardy tól mádenıetke, salt-dástúr men ádet-ǵurypqa degen súıispenshilikke baýlý, oǵan qurmet kórsetý, mádenı jetistikterdi saqtap, kóbeıtý.
Qatysýshylar óz ulttarynyń mádenıeti, salt-dástúrimen tanystyryp qana qoımaı, vokaldyq jáne bı nomerlerin usynyp, óleńder oqydy. Sondaı-aq ulttyq taǵamdar ázirlep, daıyndaý tásilderimen tanystyrdy.
Eki kúnge sozylǵan festıval aıasynda 9 ult ókilderinen quralǵan top óz ónerin ortaǵa saldy. 6 janr boıynsha kórkemdik nómirler kórsetildi. Atap aıtqanda, hor jáne vokaldy toptar, jeke oryndaý, horeografııa, dástúrli mýzykalyq-horeografııalyq kompozısııa jáne qolóner týyndylarynyń kórmesi.
«Qazaqstannyń Táýelszdiginiń 25 jyldyǵyn toılaı otyryp, Elbasynyń sara saıasatynyń arqasynda dúnıege kelgen Qazaqstan halqy Assambleıasynyń atqaryp jatqan ıgilikti isterin nasıhattaý basty mindetimiz. Egemen elimizdiń barlyq tabystary men jetistikteri – ulty men dinı senimine qaramastan «bir jaǵadan bas, bir jeńnen qol shyǵaryp» otyrǵan otandastarymyzdyń myzǵymas dostyǵynyń nátıjesi. Barlyq alǵa qoıǵan maqsattarǵa el azamattarynyń birliginiń arqasynda ǵana qol jetkize alamyz», deıdi is-sharany uıymdastyrýshylar.
Festıval sońynda «júzden – júırik, myńnan – tulpar shyqqandar» Alǵys hattarmen marapattaldy.
Oralhan Dáýit.
Derek, foto: egemen.kz