Elbasy Nursultan Nazarbaevtyń bastamasymen qolǵa alynǵan ATOM jobasy aıasynda polıgonnan zardap shekken halyqty saýyqtyrý, kózderi múlde kórmeıtin zaǵıp jandardyń ómirin belsendi ári qyzyqty etip ótkizý maqsatynda Semeı óńirinde kóptegen sharalar ótkizilip keledi. Osyǵan oraı, zaǵıp jandarǵa arnalǵan kitaphanada erekshe kórmeniń ashylýy bolyp ótti. Kórmede Semeı polıgonynyń jabylǵanyna 25 jyl jáne jazýshy Qabdesh Jumadilovtiń týǵanyna 80 jyl sııaqty mereıli mereke kúnderi qamtyldy. Jazýshynyń shyǵarmashylyq ómirine qysqasha sholý jasalyp ótti.
Zaǵıp oqyrmandar gazetterden jasalǵan Semeı polıgonynyń maketin ustap kórip, jaqsy jasalǵan degen pikirlerin aıtty. Olardyń arasynda ártúrli ádebı oıyndar ótkizildi jáne kózderi kórmese de oqyrmandarymyzdyń barlyǵy jaqsy qatysyp, zal ádemi kóńil kúıge toldy, deıdi kitaphanashy Shynar Álıasqarova. Túrli zattarǵa toly, ádebı «Sıqyrly sandyq» oıyny oqyrmandar arasynda erekshe qyzyǵýshylyq tanytty. Sıqyrly sandyqtaǵy zatty zaǵıp jandar taktıldi túrde qolymen sıpap sezý arqyly onyń qaı kitap, qaı avtorǵa arnalǵan ekenin jańylmaı birden tapty. Kitapty kóp oqýdyń arqasynda bizdiń oqyrmandar biliktiligimen jáne tapqyrlyǵymen erekshelenip osy is-sharada sony dáleldeı túskendeı. Bul taktıldi oıyndar zaǵıp jandar arasynda erekshe oryn alady jáne osyndaı arnaıy oıyndar kúndelikti ortaǵa beımdelýge kómegin tıgizedi. Oqyrmandar arnaıy tıflomagnıtolla arqyly CD dıskide jáne úntaspada dybystandyrylǵan kitaptardan úzindi tyńdap, kitaptyń avtory men atyn jyldam tabýdan aldaryna jan salmaıdy jáne de osy ıntellektýaldy oıyndarymyz qazaq jáne orys tilderinde ótedi.
Is-sharaǵa mádenıet jáne tilderdi damytý bóliminiń basshysy Berik Kópbaıuly qatysyp, izgi tilegin aıtty. Kitaphanashylardyń qolymen uıymdastyrylǵan kórme oqyrmandardyń kóńilinen shyǵyp, tamsandyrdy. Olardyń qatarynda Braıl kitaptarynan jasalǵan qazaqtyń kıiz úıi men shańyraǵy, CD dıskilerden quralǵan Beıbitshilik pen kelisim saraıynyń sulbasy, jalpaq basylymdy kitaptar jáne gazetterden jasalǵan Semeı polıgonynyń maketi joǵary baǵalandy. Kórmege kitaphana qorynda tirkelgen eń alǵashqy jalpaq basylymdy, rýlonda dybystandyrylǵan, Braıl kitaptary jáne sońǵy tirkelgen elektrondy kitaptar, 25 úntaspadan turatyn «Darabaz» kitaby qoıyldy. Kitaphana dırektory Bahytjamal Raıymhanova oqyrmandarǵa alǵysyn bildirip, úzdik oqyrmandarǵa jáne oıynǵa qatysýshylarǵa syılyqtar taratty.
Raýshan NUǴMANBEKOVA