Shyǵys óńirinde Qazaqstannyń halyq ártisteri, aǵaıyndy Abdýllınderdiń 100 jyldyq mereıtoıy keńinen atalyp ótti. Mereıtoı aıasynda oblystyq drama teatrynda «Taǵdyry bir – eki juldyz» atty kesh ótti. Merekelik konsertke kelgen qonaqtardy Shalqar Ryshanov jetekshilik etetin «Altaı» qazaq halyq aspaptary ansambli kúımen qarsy alsa, kesh shymyldyǵyn Shyǵys Qazaqstan oblysy ákiminiń sımfonııalyq orkestri (bas dırıjeri A.Galsanov) ashty. Konsert barysynda aǵaıyndy Abdýllınderdiń repertýaryndaǵy belgili shyǵarmalar oryndaldy. Máselen, Memlekettik syılyqtyń laýreaty Shahımardan Ábilov «Abaı» operasynan Abaıdyń arııasyn, Qazaqstannyń eńbek sińirgen ártisi Vıacheslav Tkach «Evgenıı Onegın» operasynan Onegınniń arııasyn, Abaı atyndaǵy akademııalyq opera jáne balet teatrynyń ánshisi Nurjan Bajekenov Lenskııdiń arııasyn oryndap, jurtshylyq yqylasyna bólendi. Sondaı-aq, Abaı, Jaıaý Musa, Aqan seri, E.Kanıo, E.Kapýlo, G.Podelskıı jáne taǵy basqa kompozıtorlardyń shyǵarmalary kórermenniń qulaq quryshyn qandyrdy. Atalǵan keshke arnaıy kelgen Múslim Abdýllınniń qyzy men uly Ǵalııa, Saǵynaı Abdýllınder, Rıshat Abdýllınniń nemeresi, belgili ánshi Karına Abdýllına da qatysyp, kórermenderge ásem ánderin arnady.
Jalpy, Shyǵys Qazaqstan Abaı, Shákárim sııaqty talaı-talaı týma talantty týǵyzǵan, dalanyń ózindeı qońyr úni kúmbirlegen qos juldyz, aǵaıyndy Abdýllınderdi de dúnıege ákelgen kıeli ólke! О́tken ǵasyrdyń 1932-1933 jyldary elimizde tuńǵysh ret ashylǵan mýzykalyq tehnıkýmnyń alǵashqy tyńdaýshylarynyń qatarynda ónerge qushtar jas talanttar Músilim men Rıshat ta boldy. Án kóginiń qos qarlyǵashy eki jyldan keıin Máskeý memlekettik konservatorııasyna oqýǵa attanǵan alǵashqy top quramyna qosyldy. Aǵaly-inili ánshilerdiń artıstik qyzmeti 1938 jyly Abaı atyndaǵy memlekettik akademııalyq opera jáne balet teatrynan bastaý alady.
«Abaı» operasynan keıin «Evgenıı Onegınniń» qoıylýynda da bir názik baılanys bar. Qazaq kórermenderin Chaıkovskııdiń ǵajaıyp mýzykasymen tanystyrǵan spektaklde basty rólder Onegın men Lenskııdi Abýllınder oınaǵan bolatyn. Aǵaıyndy ánshiler bir-birin óte jaqsy túsinetin, sondyqtan mundaı kereǵar obrazdardy qyzyqty, shynaıy, ári tabıǵı bere biletin. Olardyń ár jańa róli zamandastary tarapynan juldyzdy trıýmf retinde baǵalandy. Múslimniń sheberligin tanytqan Lenskııdiń arııasyn keıin nemere inisi, KSRO Halyq ártisi Álibek Dinishev te zor tabyspen oryndap, kórermen yqylasyna bólenýi beker emes. Bul – án qonǵan áýlet. Ákeleri Múkim Abdýllın dombyrada oınaǵan. Onyń súıemeldeýimen búkil otbasy qosylyp jıi án aıtatyn-dy.
Búginde О́skemen qalasynda aǵaıyndy Abdýllınderdiń esimimen atalatyn óner ýchılıshesi bar. Atalǵan oqý ornynda aǵaıyndy Abdýllınderdiń ómir jolynan syr shertetin mýzeı ashylǵan. 2008 jyldan bastap óner ýchılıshesinde úzdik 10 oqýshyǵa aǵaıyndy Abdýllınder atyndaǵy shákirtaqy taǵaıyndalyp keledi. Vokalıster baıqaýynyń bas júldesin pavlodarlyq Leıla Qaıyr ıelengenin aıta ketken lázim.
– Adamnyń sezimi men ishki dúnıesin áýeli sóz jetkizedi, sóz jetkize almaǵandy saz jetkizedi. Sondyqtan, áıgili ánshiler Rıshat pen Múslim Abdýllınderdiń 100 jyldyq mereıtoıy – Shyǵys óńiriniń ǵana emes, búkil elimizdiń qýanyshy. Oblys ortalyǵyndaǵy qazirgi Jambyl atyndaǵy saıabaqtyń aýmaǵynda bir kezde turǵyn úıler bolǵan eken. Sol úıde dúnıege kelgen qos juldyz búkil álemge máshhúr bolyp, elimizdiń óner salasyn ilgeriletýge úlken úles qosty. Osy rette oblys ákimi Danıal Kenjetaıulynyń tapsyrmasy boıynsha, aǵaıyndy Abdýllınderdiń 100 jyldyq mereıtoıy aıasynda jyl sońyna deıin túrli mádenı is-sharalar ótkizý kózdelgen, – degen oblys ákiminiń orynbasary Jaqsylyq Omar О́skemendegi aǵaıyndy Abdýllınder atyndaǵy óner ýchılıshesin kúrdeli jóndeýden ótkizý úshin bıýdjetten 320 mıllıon teńge qarajat bólinetinin jetkizdi.
Dýman ANASh,
«Egemen Qazaqstan»
О́SKEMEN