QARAǴANDY. 4 mamyr. Qaraǵandyda alaıaqtyq jasady degen kúdikpen qamalǵan «Faraon» týrıstik fırmasynyń basshysy Janar Ábeýp túrme qabyrǵasynda bosansa da bostandyqqa shyǵarylmady. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady.
Kúdiktiniń qorǵaýshysy túrmede bosanǵan týrfırma basshysyn kepildikke bosatýdy nemese úıqamaqqa aýystyrýdy surady. Alaıda, sotta prokýrordyń Janar Ábeýpke qatysty qamaýda ustaý merzimin uzartý boıynsha ótinishi qanaǵattandyryldy. Qazybek bı aýdandyq sotynyń sheshimimen, kúdiktiniń qamaýda bolý merzimi 8 aıǵa, ıaǵnı 2016 jyldyń 6 maýsymyna deıin uzartyldy.
Sotta prokýror sotqa deıingi tergeý amaldarynyń halyqaralyq suranys boıynsha Túrkııadan kelgen jaýapty aýdarýǵa ýaqyt qajet bolǵandyqtan aıaqtalmaı jatqanyn túsindirdi.
Qaırat Ábildınov.
Derek: Qaraǵandy oblystyq sottyń baspasóz qyzmeti.
Foto: kolomnaonline.ru.