Qazaqstan Parlamenti Senatynyń Tóraǵasy Qasym-Jomart Toqaev pen Reseı Federasııa Keńesiniń Tóraıymy Valentına Matvıenko Batys Qazaqstan oblysyna keldi. Sapar Reseı parlamentshileriniń Qazaqstanǵa resmı sapary aıasynda iske asty. Oblys ortalyǵy – Oral qalasyndaǵy kún tártibinde shekara mańyndaǵy jáne aımaqaralyq yntymaqtastyqty damytý, sondaı-aq, saýda-ekonomıkalyq jáne mádenı-gýmanıtarlyq baılanystardy nyǵaıtý máseleleri qaraldy.
Kezdesýlerdi Parlament Senatynyń Tóraǵasy Qasym-Jomart Toqaev ashyp júrgizip otyrdy. Ol Qazaqstan men Reseı senatorlarynyń aımaqtardaǵy kezdesýi úshin Oral qalasy tekten-tek tańdalyp alynbaǵanyn, bul óńir geosaıası turǵydan da, jaǵrafııalyq turǵydan da óte utymdy túrde ornalasqanyn atap kórsetti. Budan ári Senat Tóraǵasy Qazaqstan men Reseı arasyndaǵy jeti myń shaqyrymnan asatyn ortaq shekaranyń negizgi aýqymy Batys Qazaqstan sekildi shekaralyq aımaqtarǵa tıesili ekenin atap kórsetti. Taýar aınalymy men qarapaıym adamdar arasyndaǵy baılanystardyń súbeli úlesi de osy óńirlerdiń enshisine tıedi dedi ol.
Osyndaı tujyrymǵa naqty dálelder keltirgen Batys Qazaqstan oblysynyń ákimi Altaı Kólginov eýrazııalyq endikte ornalasqan óńirdiń baı tarıhy men dástúrine jáne zor ekonomıkalyq áleýetine ekpin túsirdi. Sodan soń Eýrazııalyq ekonomıkalyq odaqtyń mańyzdy róline toqtalǵan aımaq basshysy osy sheńberde ótken jyly Reseı Federasııasymen aradaǵy syrtqy saýda aınalymy 433 mıllıon AQSh dollaryn quraǵanyn mysalǵa keltirdi. Onyń aıtýynsha, búginde oblysta eki el arasyndaǵy ortaq kásipkerlik istiń 200-den astam sýbektisi tirkelgen. Shekaralyq aımaqta Qazaqstan-Reseı birlesken kásiporyndary tabysty ári nátıjeli qyzmet atqaryp keledi.
Bıylǵy jyldyń basynda paıdalanýǵa berilgen Oral qalasyndaǵy Dostyq úıinde oblystaǵy etnomádenı birlestik ókilderimen kezdesý kezinde V.I.Matvıenkonyń keńinen oılap, tereńnen tolǵaı biletin úlken parasat ıesi ekeni aıqyn kórindi. Onyń qazaqstandyqtarǵa degen shynaıy, izgilikti iltıpaty men qurmet sezimi onyń árbir sóziniń astarynan aıqyn ańǵarylyp turdy.
Qazaqstanda turatyn árbir azamat pen árbir etnos ókili Qazaqstannyń basty baılyǵy dep túsinetin Qazaqstan Prezıdenti Nursultan Nazarbaevtyń túpkilikti baılamy men tujyrymy tereń súıispenshilik sezimin týǵyzbaı qoımaıdy, dep sabaqtady óz oıyn Dostyq úıindegi kezdesýde Valentına Matvıenko.
Federasııa Keńesiniń Tóraıymy, sonymen birge, kórshiles eki el arasyndaǵy ortaq shejire men ortaq erlik dástúrleri urpaqtar sabaqtastyǵynyń arqasynda aldaǵy kezde keleshek urpaq sanasynda jańǵyra beretinine senim bildirdi. Sonyń biri – Uly Otan soǵysy kezindegi Qazaqstan men Reseı halyqtarynyń nemis fashızmin tize búktirýdegi ortaq jeńisi. Jeńis sezimi – qudiretti de qasterli sezim. Qaı kezde de bul sezimdi joǵaltpaı, boıymyzda ustaı alsaq, bizdiń ortaq tarıhymyz jadymyzdan esh ýaqytta óshpeıdi, dedi ol.
Reseıdiń memleket qaıratkerimen kezdesý kezinde Batys Qazaqstan oblystyq Qazaqstan halqy Assambleıasy aqsaqaldar keńesiniń tóraǵasy Rahmetolla Súıerbaev halqymyzdyń salty boıynsha «Qosh keldińiz!» – dep qazaq tilinde mártebeli meımanǵa qoshemet kórsetti. «Dos» qoǵamdyq birlestiginiń tóraıymy Vera Shohına shekaralas óńirlerdegi ótkizý beketteriniń múmkindigin keńeıtý, ony ózara saýda-ekonomıkalyq qarym-qatynastar úshin ońtaıly deńgeıge jetkizý jáne eki el arasynda ózara yńǵaıly týrıstik klasterdi damytý qajettiligine toqtaldy.
Buǵan jaýap retinde ún qatqan V.Matvıenko bul máseleler oblysta eki el parlamentshileri ókilderiniń qatysýymen talqylanǵanyn, búgingi kúni bul másele óz sheshimin tabýy ústinde ekenin aıtty. Sóziniń sońynda V.Matvıenko sheshimin taba almaıtyn birde-bir problemalyq máseleler bolmaıtynyn, qandaı kúrdeli isti de ózara aqyldasyp, keńese otyryp bir yńǵaıǵa keltirýge bolatynyn jetkizdi. Sonyń ishinde Qazaqstan men Reseı parlamentshileri osyndaı baǵytta ózara yqpaldasa otyryp jumys jasaı alatynyn alǵa tartty.
Qasym-Jomart Toqaev pen Valentına Matvıenko bastaǵan eki eldiń parlamentshileri Qazaqstan men Reseı arasyndaǵy ózara tıimdi mádenı baılanystar men baǵdarlamalar aıasynda oblys ortalyǵyndaǵy Kafedralyq shirkeýde, A.S Pýshkın jáne ólketaný murajaılarynda bolyp, mundaǵy qundy jádigerlermen tanysty.
Temir QUSAIYN,
«Egemen Qazaqstan»
Batys Qazaqtan oblysy