ASTANA. 13 mamyr. Zımbabve Respýblıkasynyń bıligi qýańshylyq saldarynan qoryqtaǵy jabaıy janýarlardy jappaı satý týraly sheshim qabyldady. Bul týraly 24.kz-ke silteme jasaǵan egemen.kz tilshisi habarlady.
Jan-janýarlaryn asyraýǵa sý tappaǵan qoryq qyzmetkerleri jekeniń qolyna berýge májbúr bolyp otyr. Shóldiń saldarynan ań-qustardyń basym bóligi zardap shegýde. Málimetter boıynsha, tipti qyrylyp qalýdyń aldynda tur. Sonymen qatar, arnaıy qorshalǵan aımaqta mekendeıtin janýarlar sany da shamadan tys kóbeıip ketken.
«Jabaıy tirshilik ıelerin ózimizde saqtap qalsaq, olarǵa zııanymyzdy tıgizip alamyz. Bıylǵy qýańshylyq qıyndaý bolyp tur. Janýarlardy qorektendiretin sý men jem-shóp qory joqtyń qasy. Qoryqtyń keı bólikterinde sý tartylyp qaldy. Al mundaǵylar sýsyz uzaqqa shydamaıdy», – deıdi qoryq qyzmetkeri Emannýel Fýndıra.
Zıbabve qoryqtaryn aýa raıyndaǵy El-Nıno qubylysy saldarynan qurǵaqshylyq jaılaǵan. Sý tapshylyǵynan aýyl sharýashylyǵyndaǵy egistik qýrap, memleket qazynasyna aıtarlyqtaı shyǵyn keltirgen.
Aıan Ábdýálı.
Derek, foto: 24.kz.