Uly Otan soǵysyndaǵy Jeńistiń 71 jyldyq merekesi aıasynda Qazaqstan halqy Assambleıasynyń múshesi, «Ahyska» túrik etnomádenı birlestiginiń tóraǵasy, Almaty qalasy máslıhatynyń depýtaty Zııatdın Qasanov ózi depýtattyqqa saılanǵan Alataý aýdany 26-shy okrýginiń ardagerlerin Jeńis kúnimen quttyqtady.
Mereke kúni Zııatdın Qasanov ardager atalar men apalardyń shańyraqtaryna arnaıy bas suǵyp, Uly Jeńistiń sımvoly – qalampyr gúlderin, azyq-túlikke toly sebetter jáne qarjylaı kómegin tabys etti. Ol óziniń quttyqtaý sózinde búgingi urpaqtyń ashyq aspan aıasyndaǵy tynysh, mamyra-jaı ómiri keshegi qııankesti soǵysta eli, jeri, keleshegi úshin jaýmen aıanbaı arpalysqan ardagerlerdiń erliginiń arqasynda kelgenin, sol babalarymyzdy árqashanda maqtan tutyp, qurmetteıtindigin aıtyp ótti.
Kózderine jas úıirilgen ardagerler birlestik tóraǵasyna alǵystaryn bildirip, aq batalaryn berip, endi eshqashan soǵystyń bolmaýyn, zamanymyzdyń tynyshtyǵy men eldiń amandyǵyn tileıtindikterin jetkizdi.
Gúlzeınep SÁDIRQYZY,
«Egemen Qazaqstan»
Almaty