ASTANA. 14 mamyr. Jer reformasy jónindegi komıssııa otyrysynda qatysýshylar halyqtyń kókeıinde júrgen saýaldardy kóterip, qazaq dalasynyń qadyr-qasıetin barynsha baǵalaý qajettigin alǵa tartty. Sonymen qatar, olar bos jatqan jerdi ıgerý úshin aldymen aýyldy damytyp, jastardy sol aýyldarǵa ornalastyrý kerek ekenin málimdedi. Bul týraly egemen.kz tilshisi habarlady.
Komıssııa múshesi Murat Ábenov jastar arasynda jer máselesinde birjaqty ǵana túsinik qalyptasqanyn aıtty. Ol: «Búgingi tańda elimizdiń jastary jer máselesine qatysty tek ózderiniń ishki emosııasyn ǵana bildirip júr. Shyndyǵyna kelgende jer reformasy ne úshin jasalyp jatyr, naryqtyq aınalymǵa engizý ne úshin qajet degen máselelerdi olar tereń bilmeıdi. Sondyqtan biz Jer reformasy ne úshin jasalǵanyn jastarǵa keńirek túsindirýimiz kerek», – dedi qoǵam qaıratkeri. Sondaı-aq, Murat Ábenovtyń aıtýynsha, keıingi jyldary qalanyń adamdary aýylǵa kóp baratyn bolǵan.
«Qalada oqyǵan qazaqtyń jas jigitteri aýyldan kásip ashyp, jumys jasaýdy kózdeýde. Sebebi olar aýyldyq jerlerdiń jerin ıgerýde tıimdi jaǵyn baıqady. Al aýyldyń jastary kerisinshe, qalaǵa qashyp jatyr. Sondyqtan osy jaǵdaıdy durystaý úshin jastarǵa kóbirek aqparat berýimiz kerek», – dedi ol.
Al komıssııa múshesi Nurlan Erimbetov bos jerlerdi ıgerý úshin aldymen áleýmettik turǵyda qaraý kerek dep sanaıdy.
«Biz aldymen aýyl halqyn esepke alýymyz kerek. Olardyń turmys-tirshiligine úńilip, jumyspen qamtylýyn qamtamasyz etkenimiz durys. Sosyn baryp bos jerlerdi ıgerýge kóshken jón. Otandyq kásipkerlerdi, sheteldik ınvestorlardy tartqanymyz abzal. Halyqtyń jer satylady nemese jalǵa beriledi, sosyn jerimizden aırylyp qalamyz dep qorqýyna negiz joq. Zań bar, qadaǵalaýshy organ bar, bılik bar. Olar jerimizdi tartyp alyp nemese azamattyq alyp turaqtap qalmaıdy. Eń bastysy ınvestor arqyly biz jańashyldyqty úırenemiz, jerimizdi tıimdi paıdalanamyz, jergilikti turǵynǵa jumys bolady», – deıdi ol.
Talǵat Raıymbek.
Derek, foto: egemen.kz.