Kekilbaev kerýeni toqtamaıdy

Amandyǵyn Allaǵa, zaman jú­­gin zańǵar uldaryna senip tap­syrǵan qazaqqa Ábishteı abyzynan aıyrylý ońaıǵa soqpaǵany belgili. О́lgenin jyrmen joqtaǵan, tirisi sózge toqtaǵan el azamatta­ry keshe Ulttyq akademııalyq kitaphana ujymynyń uıytqy bolýymen zamanymyzdyń zańǵar jazýshysyn eske alýǵa arnalǵan ádebı kesh ótkizdi. Kesh aıasynda Jumabek Muqanovtyń jazýshy Ábish Kekil­baıulynyń ómirine arnalǵan «Júz kúndik jalǵyzdyq» atty es­telik kitabynyń tusaýkeseri boldy. Atalmysh týyndynyń tusaýyn Qazaqstan Respýblıkasy Ardagerler uıymy Ortalyq ke­ńesiniń tóraǵasy О́mirzaq Oz­ǵanbaev pen belgili kompozıtor Ilııa Jaqanov kesip, oramdy oılaryn ortaǵa saldy. «Búkil el jınalyp Ábekeńmen qoshtasqan sát qazaq úshin aýyr boldy. Men sol sátte baldaǵyna súıenip kelgen jandardy kórdim, múgedektiń arbasyna tańylyp otyrsa da sol qoshtasýǵa qatysqan kisilerdi kórdim, Ábishtiń otbasyna kóńil aıtyp jatqan jandardan bólek, bir-birine kóńil aıtyp jatqandardy kórdim. Sol ýaqytta eldiń, halyqtyń ol kisige degen ystyq yqylasyn, móldir mahabbatyn baıqap, tereń tebirenisti kúı keshtim. Búgin tusaýyn kesip otyrǵan bul kitap qazaq úshin qazyna desek bolady. Sebebi, onyń ishinde Ábish týraly Elbasy bastap, el azamattary qostap, tamyr-tanys, jora-joldastary tolyqtyrǵan lebizder legi men eskirmes estelikter qamtylǵan. Onyń ǵajaby da osynda», – dedi О́mirzaq Ozǵanbaev. Ábish Kekilbaevqa arnalǵan sharapatty sharany belgili qoǵam qaıratkeri Myrzataı Joldasbekov júrgizip, tamyry tereń tarıh qoınaýynan Ábish jaıly ártúrli oı-tolǵamdardy ortaǵa saldy. Sondaı-aq, qoǵam qaıratkerleri, ǵalymdar qonaq bolyp paıymdy pikirlerin bildirse, aqyn, halyqaralyq «Alash» syılyǵynyń ıegeri Serik Turǵynbekov óleń oqyp, óz sózin jyrmen jetkizdi. Raýan QAIDAR, «Egemen Qazaqstan»