«Fotoóner» Qoǵamdyq birlestigi Táýelsizdiktiń 25 jyldyǵyna arnalǵan «Táýelsizdik taǵylymy» atty ulttyq joba aıasynda Ońtústik Qazaqstan oblysynda halyqaralyq «TURKESTAN-2016» fotoekspedısııasyn uıymdastyrǵan bolatyn.
15 fotojýrnalısten turatyn ekspedısııa quramynda Qytaıdan da arnaıy fotomamandar shaqyryldy. Jyl saıyn dástúrli túrde uıymdastyrylyp kele jatqan shara qazaqstandyq fotosheberler men sheteldik áriptester de qatysatyn fotoekspedısııalardyń jalǵasy bolyp tabylady.
Shymkent qalasyndaǵy Kórkemsýret galereıasynda belgili fotograf Shúkir Shahaıdyń 50 jasqa tolǵan mereıtoıyna arnalǵan «Shúkir Shahaı – 50h50» jáne «El maqtanyshtary» fotokórmesi ashyldy. Sonymen qatar, kórmege birqatar basqa fotosýret sheberleriniń týyndylary qoıyldy.
«Fotoóner» birlestiginiń tóraǵasy Asylhan Abdraıymnyń aıtýynsha, «TURKESTAN – 2016» ekspedısııasy negizinen fotomamandardyń bir-birimen ózara tájirıbe almasýyn maqsat tutady.
Aıta keterligi, ekspedısııaǵa Qytaıdan arnaıy shaqyrylǵan tanymal fotojýrnalıster – altaılyq Ardaq Beıishanuly men tarbaǵataılyq Ákpar Úrkimbaıuly atajurttyń ejelgi órkenıetter oshaǵyna aınalǵan ońtústik ólkesindegi tarıhı jerlerge alǵash ret qadam basyp otyr. Qandastarymyz «Fotoóner» qoǵamdyq birlestigine osyndaı rýhanı lázzatqa bólegenderi úshin rızashylyqtaryn bildirdi.
Fotoekspedısııa músheleri úsh kún boıy tarıhı oryndar shoǵyrlanǵan Otyrar aýdanyna, Túrkistan qalasyna baryp, Túlkibas aýdanyndaǵy Aqsý-Jabaǵyly qoryǵyn aralady.
Ekspedısııa baǵdarlamasyna sáıkes, túrki áleminiń kıeli besigi sanalatyn Túrkistanǵa arnaıy atbasyn burdy. 1396-1399 jyldary Ámir Temirdiń buıryǵymen Qoja Ahmet Iаssaýı qabiriniń basyna turǵyzylǵan kesene – úlken portaldy-kúmbezdi memorıaldyq ǵımarat, fototilshiler nazaryn aýdaryp, kózderine ottaı basyldy.
«TURKESTAN – 2016» fotoekspedısııasy Aqsý-Jabaǵylynyń 90 jyldyq mereıtoıymen dóp kelgen eken. Aqsý-Jabaǵyly – Talas Alataýynyń soltústik-batys bóligin jáne О́gem jotasyn alyp jatqan Qazaqstandaǵy tuńǵysh qoryq. Búginde aýmaǵy 131 934 gektar alqapty alyp jatqan qoryq IýNESKO-nyń dúnıejúzilik qoryqtar tizimine engen. Álemdi tańyrqatatyn tabıǵattyń tamasha túkpirine jetkende fotoekspedısııaǵa oblys ákimi Beıbit Atamqulov qosyldy.
Jalpy, «Turkestan-2016» halyqaralyq fotoekspedısııasy aıasyndaǵy sharalar munymen shektelmeıdi. О́ıtkeni, osy sapardyń túıini boıynsha uıymdastyrýshy «Fotoóner» qoǵamdyq birlestigi «Meniń elim – Qazaqstan» fotobaıqaýyn qolǵa almaqshy. Al, eń bastysy, bıylǵy is-sharalardyń qorytyndysy retinde «Táýelsizdik taǵylymy – 25» fotokórmesin ótkizý josparlanǵan. Onda Qazaqstannyń eń úzdik fotojýrnalısteri usynatyn 125 fototýyndy el Táýelsizdiginiń 25 jyldyǵy aıasynda pash etilip, baıqaý jeńimpazdary jarııalanatyn bolady.
Erlan OMAROV,
«Egemen Qazaqstan»
Sýretterdi túsirgen avtor
