Toyota aqaýy bar 1,5 mln. kólikti keri qaıtarady

ASTANA. 24 mamyr. Japonııanyń belgili Toyota avtokonserni Takata kompanııasy ornatqan qaýipsizdik qapshyǵynyń olqylyǵyna baılanysty AQSh-ta 1,5 mıllıon kólikti keri qaıtarady. Bul týraly TASS aqparat agenttigine silteme jasaǵan egemen.kz tilshisi habarlady. Málimetter boıynsha, barlyǵy 9 úlgidegi kólikterde aqaýy bar ekeni anyqtaldy. Olardyń qatarynda 2006-2011 jyldary shyqqan Corolla, Yaris, Sienna avtomobılderi bar. Toyota basshylyǵynyń málimdeýinshe, aldyńǵy oryndaǵy qaýipsizdik qapshyǵynyń pıropatrony aýystyrylady. Qazirgi tańda Toyota konserni Takata kompanııasy qaýipsizdik qapshyǵyn ornatqan 4,7 mıllıonnan astam kólikti keri shaqyrǵan. Aıta keteıik, Takata 2014 jyly úlken daýdyń ortasynda qalǵan. AQSh bıligi jol apaty kezinde qaýipsizdik qapshyǵynyń der kezinde ashylmaı qalatynyn nemese kútpegen sátte ashylyp, kólik ishindegi jolaýshylarǵa zardabyn tıgizetinin anyqtaǵan. Aıan Ábdýálı. Derek, foto: TASS.