ShYMKENT. 24 mamyr. Budan eki apta buryn joǵalyp ketken stýdent Aıgerim Ospanbekovanyń máıiti Qazyǵurt aýdanynyń aýmaǵynan tabyldy. Bul týraly Ońtústik Qazaqstan oblysy Saryaǵash aýdandyq prokýratýrasynyń málimetine súıengen egemen.kz tilshisi habarlady.
Eske sala keteıik, bıylǵy jylǵy 11 mamyr kúni Saryaǵash aýdanynyń 53 jastaǵy turǵyny aýdandyq ishki ister bólimine óziniń 1998 jyly týǵan qyzy, 1-kýrs stýdenti Ospanbekova Aıgerim Súnnatqyzynyń 10 mamyr kúni saǵat 15:00 shamasynda oqýyna barý úshin Shymkentke ketip bara jatqan jolynda kenet joǵalyp ketkenin aıtyp, shaǵymdanyp keldi.
Atalmysh fakt sotqa deıingi tekserýdiń birtutas tizimine engizildi. Osyǵan baılanysty Saryaǵash aýdandyq ishki ister bóliminiń qyzmetkerleri joǵalǵan qyzǵa izdeý jarııalady.
Sol kúni 18 jasar stýdent qyzdyń Jetisaı-Shymkent tasjolynyń Saryaǵash aýdanyna qarasty Jańaturmys aýyly tusynan jolaı kezdesken kólikke otyrǵany belgili boldy. Ol mashınada kele jatyp, taksı júrgizýshiniń túrinen qorqyp kele jatqanyn, ózin Shymkentte kútip alýdy ótinip, áldekimge sms tastaǵan eken. Biraq birazdan soń ózi eshkimniń qońyraýyna jaýap bermeı qoıady. Aqyrynda oblys ortalyǵyna jetpegen.
Joǵalǵan stýdent qyzdyń máıiti Jańaturmys aýylynyń kóripkeli Orynhan Júnisovtiń aqpary boıynsha Qazyǵurt aýdanynyń aýmaǵynan, Baǵys aýylyna jaqyn jerden keshe keshke tabylǵan. Bıdiń aıtýynsha, qyz óler aldynda biraz qorlanǵan. Al búgin tańerteń marqumnyń denesi jer qoınyna berildi.
Qyzdyń naqty qalaı qaza tapqany ázirge ashylǵan joq.
Ońtústik Qazaqstan oblystyq ishki ister departamentiniń deregi boıynsha, qylmysker aldymen Aıgerimdi qorlaǵan, sodan keıin ózin óltirgen. «23.05.2016 jyly shamamen 18.00 saǵatta Saryaǵash aýdandyq ishki ister bóliminiń kezekshi bólimine bir turǵyn Saryaǵash aýdanyndaǵy Baǵys aýylynyń janynan bir áıeldiń óli denesi tabylǵany týraly habary tústi. Jedel-izdestirý toby Saryaǵash aýdanynyń Baǵys aýylyna qaraı baratyn asfalt joldyń boıynan 130 metrdeı qashyqtyqtan áıel adamnyń máıitin tapqan. Onyń moıny, oń qoly men eki aıaǵy tússiz skotchpen jáne toqyma beldikpen baılanyp tastalǵan. Polıseıler jedel-izdestirý sharalaryn júrgizý barysynda onyń budan buryn joǵalyp ketken Ospanbekova Aıgerim ekenin tanydy», - delingen habarlamada.
Qazirgi tańda 1998 jyly týǵan qyzdy óltirýshi kúdikti retinde 1990 jylǵy jigit ustaldy. Odan aıǵaqty zattar retinde qyzdyń uıaly telefony men aqshasy alyndy. Qazir kúdiktiniń ústinen kisi óltirý baby boıynsha qylmystyq is qozǵaldy.
Baqtııar Taıjan.
Derek, foto: Ońtústik Qazaqstan oblystyq ishki ister departamentiniń baspasóz qyzmeti.
