«Attandyq saparǵa, Kóńilde mol úmit!»

Saryaǵashtyqtar soltústik óńirlermen tanysýǵa bet aldy Ońtústik – adam resýrsyna baı. Bul bir jaǵynan maqta­nysh bolǵanymen, ekinshi jaǵy­nan ekono­mıkalyq qıyndyq týǵyzat­yn­dyǵyn jasyrýǵa bolmaıdy. Respýblıka boıynsha aýyl sharýashylyǵynan tamasha jetis­tikke jetip, tek jylyjaı salasyndaǵy úlesi 87 paıyz mejege jetken Ońtústik Qazaqstan oblysynda iri agrosharýashylyqtar saýsaqpen sanarlyqtaı. Jer qorynyń azdyǵynan bir-eki gektar jeri bar sharýalar qansha epti bolǵanymen, qysqa jibi kúrmeýge kelmeı, Úkimetten beriletin kómek­ter­di ala almaı, kúıinip júredi. Esesine Qazaqstannyń soltústik oblystarynda halyq sany az, jer qory kóp. Elbasy ońtústikke kelgen saparynyń birinde keleli keńeste jumys tappaı júrgen ońtús­tikqazaqstandyqtardyń sol­tús­tikke qonys aýdaryp, jaǵdaı­laryn túzeýge aqyl qosqan. Syrt deıtindeı emes, eki jaq ta – qazaq jeri. El aǵalary maqul kórgen. Jaqynda Saryaǵash aýdanyna oblystyq máslıhattyń hatshysy Hamıt Aıtóreev arnaıy issaparmen baryp, jurtshylyqqa «Serpin» baǵdarlamasy aıasynda qolǵa alynyp jatqan jumystar jaıynda keńes ótkizdi. El ishi – altyn besik. «Elde bolsa, eringe tıedi» deıtin, memlekettiń keleshegine bir azamaty retinde úles qosyp júrgen aqberender kóp. Sonyń biri – belgili kásipker, oblystyq máslıhattyń depýtaty Jańabaı Aǵabekov: «Soltústikke qonys aýdaratyn jerlesterimniń kóshi-qon shyǵynyn, tehnıkasyn ózim kóteremin. Soltústik Qazaqstan da óz jerimiz. Tabıǵaty qatal dep qoryqpańyzdar», – degen. Saryaǵash aýdanynyń ákimi Buharbaı Parmanov – kóbik sóz, qurǵaq ýádeniń emes, naǵyz istiń adamy. «Soltústik aımaqta tabıǵat qatqyldaý bolǵanymen, jeriniń qunar­lylyǵy óte joǵary. Biz birge baramyz. Ol jaqtyń turmys ja­ǵ­daıy­­men tanysamyz. Aýdan ákim­deri­­men sóılesip, qandaı jerlerdi bere­tinderin baıqaımyz. Kóshirip tastap, is sonymen bitpeıdi. Biz árdaıym baılanysta bolamyz», – dedi ol. Osylaısha, jumys toby qurylǵan. El aǵalarynyń ýájine toqtaǵan, turmys jaǵdaıyn túzeýge bekingen kerýen, 40 adamnan turatyn top  soltústikke attandy. Bul alǵash­qy sapar emes. Burynyraq barǵan­dar búginde baqýatty otbasylarǵa aınalǵanyn osyndaǵy aǵaıyndar biledi. Baqtııar TAIJAN, «Egemen Qazaqstan»