Pavlodarda turǵyn úı qurylysyna 2,2 mlrd. teńge bólindi

PAVLODAR. 25 mamyr. Pavlodarda jergilikti bıýdjetten turǵyn úı men jatahana qurylysyna 2,2 mlrd. teńge qarjy bólindi. Osyǵan oraı oblys ákimdigi men «Ortalyq-Azııa otyn-energetıka kompanııasy» aksıonerlik qoǵamy arasynda bıznestiń áleýmettik jaýapkershiligi sheńberinde ózara tıimdi áriptestik týraly memorandýmǵa qol qoıyldy. Bul týraly egemen.kz tilshisi habarlaıdy. Pavlodar oblysynyń ákimi Baqaýov Bolat pen kásiporynnyń dırektorlar keńesiniń tóraǵasy Erkin Ámirhanov qol qoıǵan qujat óńirdiń damýyna, «PAVLODARENERGO» aksıonerlik qoǵamy kásiporynynyń jumysshylaryna qajetti turǵyn úı baǵdarlamasyn júzege asyrýǵa baǵyttalady. «Ortalyq-Azııa otyn-energetıka kompanııasy» oblys ortalyǵynda jalpy aýdany 9 692 sharshy metrdi quraıtyn kóp qabatty turǵyn úı, stýdentterge arnalǵan 200 oryndyq jataqhananyń qurylysyn qarjylandyrady. Oblys ákimdigi óz tarapynan jer ýchaskesin bólý, qujattardy rásimdeý, ınjenerlik-kommýnıkasııalyq ınfraqurylymdardy tartýǵa qoldaý kórsetedi. Kompanııa oblys ortalyǵyndaǵy «Energetık» profılaktorııin, «Elektronık» balalar saýyqtyrý lageriniń qyzmetine qoldaý kórsetýde. Aıta keteıik, atalǵan kompanııa elimizdegi «Kaýstık», «Qazaqstannyń EksımBanki», «Astana-Invest» ınvestısııalar úıi» sekildi birneshe aksıonerlik qoǵamdarynyń aksııalaryna ıe. Farıda Byqaı Derek: egemen.kz. Foto: Valerıı Býgaev.