«Shabyt-Mereı» shattyqqa bóledi

Taıaýda Qazaq ulttyq óner ýnıversıteti Prezıdent janyndaǵy áıelder isteri jáne otbasylyq-demografııalyq saıasat jónindegi ulttyq komıssııamen birlese otyryp, múmkindigi shekteýli jáne jetim balalar arasyndaǵy daryndy jasóspirimder shyǵarmashylyǵynyń «ShABYT-MEREI»  I respýblıkalyq baıqaýyn ótkizdi. Baıqaýǵa qatysýshylar jas erekshelikterine qaraı (I – 7-9 jas; II – 10-13 jas; III – 14-16 jas) úsh topqa iriktelip, óner kór­setti. Baıqaý Jambyl atyndaǵy kon­serttik zalda estradalyq án salý janry boıynsha ótkizildi. Atal­ǵan óner baıqaýynyń aıasy keń. Baı­qaýǵa elimizdiń túkpir-túk­piri­nen jınalǵan 25 úmitker ózara baq synasty. Onda, ásirese, el Táýel­siz­diginiń 25 jyldyǵyna oraı, otan­shyldyq, týǵan jer, beıbit­shilik jáne kelisim, halyqtar dos­tyǵy, izgilik pen meıirim taqy­ryp­taryna erekshe basymdyq berilgen eken. Baıqaý jeńimpazdaryna Qazaq ulttyq óner ýnıversıtetiniń rektory, Qazaqstannyń Eńbek Eri Aıman Musaqojaeva jáne estrada juldyzdary, Qazaqstannyń eńbek sińirgen qaıratkerleri: Maıra Ilııasova, Altynaı Jorabaeva, Azamat Jyltyrkózov, sondaı-aq, Marjan Arapbaeva, Araılym Raqymqyzy, Telman Núrkenov, Dımash Qudaıbergenov sekildi belgili óner ıeleri óz attarynan júldeler tapsyrdy. Bas júldeni múmkindigi shek­­­teýli balalar arasynan oq boıy ozyq shyqqan astanalyq Han Valerııa ıelendi. I oryn Allabergen Ábeýov, Alına Qasenova men Danıl Platısınge buıyrdy. Al jetim balalar sanatyndaǵy Bas júldeni pavlodarlyq daryn­dy jasóspirim Karına Mamyrova, I oryndy «Nur Astana» vokaldyq toby men «Aıgólek» kvınteti jeńip aldy. Sonymen qosa, 2, 3, 4-oryn ıeger­leri anyqtalyp, arnaıy júldelermen marapattaldy. Baıqaýǵa qatysýshylardyń barlyǵyna Alǵys hattar men baǵaly syılyqtar tabys etildi. Igilikti is-sharada balalar shattyqqa bólenip, mereıleri tasydy. Kóńilderi kóterilip, máz bolysty. Aldaǵy ýaqytta da osyndaı saýaby mol sharalar jıirek ótkizilip tursa, nur ústine nur bolar edi. Raýshan SÚLEIMENOVA